Балаҕан ыйын 15-21 күннэригэр Минскэйгэ «Стайки» олимпийскай бэлэмнэнии киинин аатырбыт өрөспүүбүлүкэтээҕи базатыгар кикбоксиҥҥа аан дойду Кубога (WKF) ыытыллыаҕа. Россия сүүмэрдэммит хамаандатын састаабыгар Саха сириттэн биэс файтер кыттыаҕа. Ол туһунан сүүмэрдэммит хамаандалары бэлэмниир киин иһитиннэрдэ, суруйар ЯСИА.
«Россия хамаандата дойду чемпионатын түмүгүнэн тэрилиннэ. Мэтээллээхтэр аан дойдутааҕы күрэхтэһиигэ Беларусь куоракка барар быраабы ыллылар. Биһиги кикбоксердарбыт Дьокуускайга «Триумф» өрөспүүбүлүкэтээҕи спортивнай бэлэмнэнии киинин баазатыгар хомуурдары аастылар. Оҕолор улахан суолталаах стартка бэлэмнэр», — диэн кэпсээтэ Саха сирин сүүмэрдэммит хамаандатын кылаабынай тренерэ Андрей Алексеев.
Сүүмэрдэммит хамаандаҕа титуллаах спортсменнар киирдилэр. Аан дойду Кубогар лоу-кик салаатыгар Михаил Слепцов (54 кг), Тимофей Сивцев (60 кг), Михаил Иванов (71 кг), Адулай Хуцуруев (91 кг) кыттыахтара. К1 көрсүһүүгэ рингэҕэ Айтал Петров (71 кг) тахсыаҕа.
This post was published on 12.09.2025 14:30 14:30