Россия спортка миниистирэ Павел Колобков бирикээһинэн Саха сириттэн икки киһиэхэ «РФ спордун маастара» ааттар туттарыллаллар. Нуорманы Алена Гурьева буулдьанан ытыыга уонна Александр Пестерев стендовайга толордулар, диэн иһитиннэрэр СИА.
Томпо улууһун бэрэстэбиитэлэ Алена Гурьева Иван Кульбертинов Бүтүн Россиятааҕы турнирыгар нуорманы толордо. Күрэхтэһии кулун тутар ыйга Дьокуускай куоракка буолбута. Быйыл Красноярскайга буолбут Бүтүн Россиятааҕы күрэхтэһиигэ, Саха сирин норуоттарын спортивнай оонньууларыгар муҥутуур кыайыылаах. Татарстаҥҥа ыытыллыбыт үөрэнээччилэр Бүтүн Россиятааҕы спартакиадаларыгар бириистээх миэстэҕэ тиксибитэ.
Стендовай ытыыга Россия спордун маастара ааты Амма улууһуттан Александр Пестерев ылар. Кини ааспыт сылга дойду чемпионатыгар «В» категориялаахтар ортолоругар кыһыл көмүс мэтээли ылбыта. Быйыл Александр Миронов турнирыгар өрөспүүбүлүкэтээҕи күрэхтэһиигэ, өрөспүүбүлүкэ чемпионатыгар уонна Саха сирин норуоттарын спортивнай оонньууларыгар миэстэлэспитэ.
This post was published on 03.10.2019 16:37 16:37