Саха сирин хотугу өрүстэрэ арыллан эрэллэр. Бэҕэһээ, ыам ыйын 24 күнүгэр Дьааҥы, Индигиркэ уонна Алазея өрүстэргэ муус устан саҕалаата.
Сааскы халаан уутун содулларын туоратыыга уонна чөлүгэр түһэрэр үлэни тэрийиигэ ситэриилээх дирекция техническэй отделын начальнига Мирон Эртюков иһитиннэрбитинэн, уу таһыма критическэй буола илик.
Халыма өрүскэ муус Орто уонна Аллараа Халыма оройуоннарын кыраныыссаларыгар кэллэ. Кэлэр сууккаҕа муус Аллараа Халымаҕа тиийиэҕэ. Березовкаҕа өрүс уутун таһыма чугастааҕы сууккаҕа салгыы түһүөҕэ.
Дьааҥы улууһун сиригэр өрүскэ ырбыылаах. Индигиркэҕэ уонна кини тардыыларыгар уу таһыма үрдээн иһэр.
This post was published on 25.05.2023 14:03 14:03