Академик Л.В. Киренскэй аатынан Амма лицейин «Экипаж» хамаандата атырдьах ыйын 12-16 күннэригэр Челябинскайдааҕы үрдүкү байыаннай авиационнай штурманнар училищеларын базатыгар ыытыллыбыт «ЮНАВИА» Бүтүн Россиятааҕы байыаннай-спортивнай оонньууга үһүс миэстэни ылла. Күрэхтэһиигэ Россия 22 регионуттан 200-тэн тахса эдэр армеец кытынна, диэн «Амма олоҕо» хаһыат иһитиннэрэр.
Эдэр армеецтар «Авиационнай штурмҥа» (викторина, парашюты сааһылааһын, ытыы, бастакы көмөнү оҥоруу уонна эвакуация элеменнэрдээх 1500 миэтэрэ мэһэйдээх балаһа), пилотнай көтөр аппараттары салайыыга уонна авиамоделировкалыыр күрэхтэһиилэргэ кытыннылар. Кыттааччылар бэриллибит матырыйааллартан моделлары хомуйан үлэлэттилэр.
Маны сэргэ кыттааччыларга лазертагынан турнир ыытылынна, СВО кыттыылаахтарын кытта көрсүһүүлэри уонна Челябинскайга экскурсиялары тэрийдилэр.
Оонньуу бары түһүмэхтэрин түмүгүнэн Амма лицейин «Экипаж» хамаандата уопсай ахсааҥҥа үһүс түмүгү көрдөрдө. Москуба уонна Оренбургскай уобалас хамаандалартан хоттордо. Хамаандаҕа үрдүкү кылаас биэс үөрэнээччитэ киирдэ. Салайааччыларынан «Юнармия» отделениетын начаалынньыга Мичил Винокуров уонна лицей физкультуратын уонна ОБЖ учуутала Артем Нестеров сырыттылар.
This post was published on 18.08.2025 11:23 11:23