17 От ыйа 17.07
  • 18°
  • $ 88,28
  • 96,26

Саха сирин дьонун уйгута улаатарын туһугар: Муниципалитеттар 2015 сылга АЛРОСА-ттан 1,2 млрд.солк. ылбыттар

15:04, 07 июля 2016
Читайте нас на
Яндекс Новости
ЯДВ

АЛРОСА АК үлэтин биир сүрүн хайысхатынан «Алмаас провинциятын» ахсааныгар киирэр оройуоннары өйөөһүн буолар. Сыл аайы компания өрөспүүбүлүкэ аҕыс оройуоннарыгар дивиденнэри ыытар, ити үп-харчы социальнай бырагырааманы толорууга туттуллар.


Анабыр, Үөһээ Бүлүү, Бүлүү, Ленскэй, Мииринэй, Ньурба, Өлүөхүмэ, Сунтаар улуустара АЛРОСА акцияларын 1% ылаллар. Холобур, 2014 сыллаахха итиниэхэ тус сыаллаахтык бэриллэр үп-харчы 866 мөл.тахса солк. тэҥнэспит. Хас биирдии оройуоҥҥа 108,2 мөл.солк.тиксибит.

2015 сыл түмүгүнэн муниципалитеттарга уопсайа 1,2 млрд.солк., ол эбэтэр хас биирдии улууска 153,9 мөл. солк. бэриллибитин туһунан СИА-ҕа СӨ баайга-дуолга уонна сир сыһыаннаһыыларыгар министиэристибэттэн эттилэр.

Өлөөн улууһун баһылыга Александр Иванов

«Алмаас компанията биэрбит үбүгэр харчытыгар билигин Өлөөҥҥө 98 миэстэлээх оҕо садын тутуу бара турар. Итини таһынан АЛРОСА баҕа өттүнэн үп-харчы биэрэр. Ол суотугар оройуон киинигэр этнокультурнай киин түһүмэҕинэн тутулла турар. Дивиден социальнай соруктары олоххо киллэрэрбитигэр, Хоту норуоттар үгэс буолбут дьарыктарын өйүүрбүтүгэр улахан көмөлөөх», — диир Өлөөн улууһун баһылыга Александр Иванов.

Анаабыр улууһун баһылыга Иван Семенов

«Биһиги алмаас үлэһиттэрин кытта 35 сылбытын бииргэ үлэлиибит. Кэлиҥҥи сылларга хардарыта үлэбит көдьүүһэ улахан. АЛРОСА акцияларыттан киирэр дивидени таһынан АЛРОСА иһинэн үлэлиир «Анаабыр алмаастара» уонна «Аллараа Ленскэйдээҕи» тэрилтэлэри кытта дуогабар түһэрсибиппит. Бу икки тэрилтэттэн сыл аайы быһа холуйан 60 мөл.солк. ылабыт. Биллэн турар, үп-харчы оройуоҥҥа өйөбүлэ улахан. Холобур быһыытынан кэпсээтэхпинэ, кэккэ төрүөккэ олоҕуран улууспут хаарбах, эргэ дьиэлэртэн дьону көһөрүү бырагырааматыгар киирбэтэҕэ. Манна компаниялар көмөҕө кэлэннэр, хас да эбийиэги туттубут. Ол курдук, элбэх квартиралаах дьиэлэр, социальнай суолталаах тутуулар баар буоллулар. Ону таһынан хапытаалынай өрөмүөнннээһини оҥоробут, саҥа тиэхиньикэни атыылаһабыт. Итини сэргэ үбү-харчыны ыччат политикатыгар, оҕо сайыҥҥы сынньалаҥын тэрийиигэ ыытабыт. Үп-харчы сыалынан туттулларын бырабыыталыстыба кыраҕытык хонтуруоллуур», — диэтэ Анаабыр улууһун баһылыга Иван Семенов.

Василий Лукьянцев, Ленскэй баһылыгын э.т

«Толооҥҥо 100 үөрэнэр, 30 олорор миэстэлээх оскуола-интэрнээти тутарга бэлэм буоллубут. Урукку өттүгэр ылбыт үппүтүн-харчыбытын оскуола иннинээҕи тэрилтэлэри өрөмүөннүүргэ ыыпппыппыт. Ону таһынан 80 миэстэлээх «Лучик» оҕо сада тутуллубута», — диэтэ Ленскэй оройоунун баһылыгын э.т. Василий Лукьянцев.

Сергей Винокуров, Бүлүү улууһун баһылыга.

«АЛРОСА дивиденэ – оройуон бюджетыгар ураты улахан көмөлөөх. Чопчу холобурдары аҕалар буоллахха, ити суотугар билигин култуура дыбарыаһа тутуллар. Тутууну эһиил Олоҥхо Ыһыаҕар үөрүүлээхтик аһыахпыт. Ону таһынан кыбаарталы итиинэн хааччыйар хочуолунайы тутабыт. Онно эргэ дьиэлэртэн дьону көһөрүү бырагырааматынан тутулла турар олорор дьиэлэр холбонуохтара. Итини таһынан АЛРОСА-ттан кэлбит харчы куораты бүтүннүүтүн ыраас уунан хааччыйыаҕа. Үп-харчы сороҕо Таһаҕарга оскуоланы тутууга бэрилиннэ», — диэтэ Бүлүү улууһун баһылыга Сергей Винокуров.

Приватизация чэрчитинэн АЛРОСА  РФ бас билиитигэр баар акцияларын 10,9% атыыланаары турар. «Россия бырабыыталыстыбатын кытта түһэрсиллибит сөбүлэһии иитинэн өрөспүүбүлүкэ акциялара судаарыстыба бас билиитигэр хаалаллар. Аҕыс улуустар гиэнэ сокуонунан көмүскэллээхтэр уонна өрөспүүбүлүкэ акцияларын кытта бииргэ салайылаллар», — диэн олунньуга Саха сирин баһылыга  Егор Борисов эппитэ.

Следите за самым важным и интересным в Telegram-канале и WhatsApp-группе ЯСИА
Тутаах тыллар