Кулун тутар 6 күнүгэр, Аан Дойдутааҕы дьахталлар күннэрин иннинэ, Дьокуускайга элбэх оҕолоох ийэлэри уонна өрөспүүбүлүкэ идэлээх дьахталларын наҕараадалаатылар. Судаарыстыбаннай бэлиэлэри, ааттары уонна грамоталары Саха сирин 24 кэрэ аҥарыгар регион бырабыыталыстыбатын бэрэссэдээтэлэ Кирилл Бычков туттарда.
«Үгүс дьахталлар ийэ, хаһаайка буолууну, идэлэрин бэйэлэрин дьыалаларыгар дьүөрэлиир сатабылларынан сөхтөрөллөр. Саха дьахталлара араас эйгэҕэ, ол иһигэр эр киһи үлэтинэн ааҕыллар, идэлэргэ үлэлииллэр. Саха сирин историята дьахталлар регион үөскээһинигэр уонна сайдыытыгар уһулуччулаах кылааттарын аҕыйаҕа суох холобурдарын кэпсиир. Аныгы саха дьахталлара үрдүк профессионализмы, туруоруммут сыалларын ситиһиигэ дьулуурдаах, талбыт дьыалатыгар бэриниилээх буолууларын көрдөрөллөр. Бүгүн дьахталлар наукаҕа, үөрэхтээһиҥҥэ, доруобуйа харыстабылыгар, култуураҕа, урбааҥҥа уонна судаарыстыбаннай салайыыга улахан ситиһиилэри оҥороллор», – диэн Кирилл Бычков бэлиэтээтэ.
«Ийэ албан аата» I истиэпэннээх бэлиэни Нам улууһуттан Туйаара Панькова уонна Ньурба улууһуттан Жанна Семенова ыллылар, кинилэр тоҕус оҕону төрөтөн, иитэн-үөрэтэн таһаардылар.
«Ийэ албан аата» II истиэпэннээх бэлиэнэн Жатайтан Алеся Голикованы, Нам оройуонуттан Намира Иванованы уонна Александра Кривошапкины, Ньурба улууһуттан Варвара Николаеваны наҕараадалаатылар. Дьахталлар аҕыс оҕону төрөтөн, дьиэ кэргэҥҥэ иитэллэр.
«Ийэ албан аата» бэлиэ III истиэпэнин өссө 11 дьахтарга сэттэ оҕолоох: Айталаана Алексеева, Виктория Алексеева, Капитолина Гаврильева, Анна Григорьева, Надежда Домотова, Вера Иванова, Изабелла Мигалкина, Туйара Новикова, Апрелина Павлова, Ольга Софронова уонна Сардаана Третьякова туттулар.
Өрөспүүбүлүкэ үөрэҕириитин үтүөлээх үлэһитинэн Дьокуускайга «Кэскил» оҕо саадын сэбиэдиссэйэ Сардаана Захарова билинилиннэ. Саха сирин баһылыгын грамотатынан Уус Алдан улууһун потребительскай кооперациятын бэтэрээнэ Матрена Жиркова, Дьокуускайга дьыала управлениетын салайааччытын солбуйааччы Лена Семенова уонна «Камелек» арт-студия мастарыскыайын сэбиэдиссэйэ Кристина Яковлева наҕараадаланнылар.
Өрөспүүбүлүкэ бырабыыталыстыбатын грамотатын субсидия Агентствотын директорын бастакы солбуйааччы Наталья Николаеваҕа туттардылар. Махтал суругу Нам историко-этнографическай музейын киновидеоархивын отделын сэбиэдиссэйэ Вера Поповаҕа туттарда. «Гражданскай килбиэн» бэлиэнэн Саха сирин худуоһунньуктарын Сойууһун искусствоведа Зинаида Иванова бэлиэтэннэ.
This post was published on 06.03.2026 15:21 15:21