Дьиэ кэргэни, оҕону уонна кырдьаҕастары өйүүр хайысхалар үбүлээһиннэрин үрдэтэр туһунан бырабыыталыстыба көрдө.
130 млрд 263,5 мөл. солк. Саха сиригэр социальнай өйөбүлгэ 2026 сылга ыытыллыаҕа. Регион судаарыстыбаннай бюджетыгар судаарыстыба социальнай эбээһинэһин барытын эппиэтинэстээхтик уонна кэмигэр толоруу инники күөҥҥэ хаалар, диэн тоһоҕолоон бэлиэтээтэ Саха сирин үбүн министрин э.т. Иван Алексеев «2026 сылга уоннаа 2027 уонна 2028 сыллар былааннаах кэмнэригэр Саха Өрөспүүбүлүкэтин судаарыстыбаннай бюджетын туһунан» сокуон бырайыагынан аһаҕас истиилэригэр.
«2026 сылга өрөспүүбүлүкэ судаарыстыбаннай бюджетын бырайыага социальнай приоритеты тутуһар. Дьиэ кэргэни, оҕону уонна кырдьаҕастары өйүүр хайысхалар үбүлээһиннэрин үрдэтэр туһунан бырабыыталыстыба көрдө. Ити саха дьонун олоҕун хаачыстыбатын үрдэтиигэ хайысханы тутуһууну бигэргэтэр», — диэн бэлиэтииллэр Саха сирин үп министиэристибэтигэр.
«Дьиэ кэргэни өйөөһүн» регионнааҕы бырайыагы үбүлээһин 117,5 мөл.солк. улаатар. Бу үп-харчы өрөспүүбүлүкэтээҕи ийэ хапытаалыгар, дьиэ кэргэн тэриммит эдэр ыалларга, бастакы оҕо төрөөбүтүгэр биир кэмнээх, оҕолор ыйдааҕы босуобуйаларыгар тыырыллар.
Ону тэҥэ кыаммат ыалларга социальнай дуогабар быһыытынан социальнай өйөбүлгэ ороскуот, элбэх оҕолоох ыаллартан оскуолалары бүтэрээччилэр орто профтехучилищеларга төлөбүрдээх үөрэххэ киирдэхтэринэ сыанатын сорҕотун толуйарга бэриллэрэ былааннаммыт.
2026 сылга судаарыстыбаннай бюджет дохуотун уопсай кээмэйэ 309 млрд 768,2 мөл. солк. буолуоҕа, 2026 сылга судаарыстыбаннай бюджет ороскуотун кээмэйэ 317 млрд 339,7 мөл.солк. таһымынан быһаарылынна. Саха сирин судаарыстыбаннай бюджета 27 судаарыстыбаннай бырагыраама комплексын быһыытынан, 6 стратегическай сыалы (блокы) ситиһэргэ туһуламмыт.
This post was published on 15.10.2025 15:30 15:30