Саха сириттэн байыаннай эпэрээссийэ буола турар сиригэр саҥа гуманитарнай көмө баартыйата тиийдэ. Байыастарга 18 тиэхиньикэни, хаххалыыр сиэккэлэри уо.д.а туһалаах тэриллэри тириэртилэр. Ону таһынан, сотору кэминэн байыаннай чаастарга 6 квадроцикл тиийиэхтээх. Бу туһунан СӨ нэһилиэнньэ олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлин солбуйааччы Яна Наумова иһитиннэрдэ.
«Билигин өссө биир гуманитарнай көмө барарга бэлэм. Манна 6 массыына, хаххалыыр сиэккэлэр, байыастарга тус аадырыстаах баһыылкалар бааллар», — диэтэ Яна Наумова.
Кини бэлиэтээбитинэн, байыаннай эпэрээссийэ буола турар сиригэр Саха сирин тирэх пууннара көхтөөхтүк үлэлииллэр.
«Туруоруллубут сыаллар-соруктар толору оҥоһулаллар. Саха сирэ байыастарга бары өттүнэн көмөнү оҥорор, өйүүр. Байыаннай эпэрээссиийэ кыттыылаахтарын эбии тиэхинньикэнэн, малынан-салынан хааччыйыы ураты болҕомтоҕо турар, үлэ салҕанар», — диэн Яна Наумова тоһоҕолоон эттэ, суруйда Саха сирэ саайт.
This post was published on 18.01.2024 13:01 13:01