Саха сиригэр гражданскай уопсастыбаны сайыннарыыга Саха сирин баһылыгын граннарын куонкуруһугар сайаапкалары ылыы түмүктэннэ. Барыта 388 сайаапка 600-тэн тахса мөлүйүөн солкуобай суумалаахха киирдэ. 2025 сылга грант өйөбүлүгэр бюджеттан көрүллүбүт уопсай суумата 93 мөл.666 тыһ. 778 солк. тэҥнэһэр. Билигин бырайыактар бары тутулуга суох экспертизаны ааһаллар. Куонкурус бүтэһиктээх түмүктэрэ сэтинньи 20 күнүн кэнниттэн биллиэхтэрэ.
Баһылык граннарын конкурстара — бу Саха сиригэр коммерческайа суох тэрилтэлэр олоххо киллэрэр социальнай суолталаах бырайыактары үбүнэн өйүүр регионнааҕы бырагыраама буолар.
Куонкуруска уопсастыбаннай түмсүүлэр кыттыахтарын сөп. Кинилэр бары официальнайдык регистрацияланан Саха сиригэр үлэлиллэр. Хас биирдии кыттааччы 16 хайысха аайы биир эрэ сайаапка түһэрэр кыахтаах.
Быйыл саамай биллэр хайысхаларынан буоллулар: патриотическай иитии – 66 сайабылыанньа (96,2 мөл.солк.); ыччат бэлиитикэтэ – 55 сайабылыанньа (115,1 мөл. солк.); культура, искусство уонна духуобунай сайдыы – 54 сайабылыанньа (89,4 мөл. солк.); доруобуйа, физкультура уонна спорт – 48 сайабылыанньа (69,7 мөл. солк.); наука, үөрэх уонна сырдатар үлэ – 32 сайабылыанньа (48,6 мөл. солк.).
Бу тэрилтэлэргэ бастыҥ идеяларын билиһиннэрэр, ыра санааларын олоххо киллэрэр, тулалыыр эйгэни тупсарар улахан кыах буолар. Ол курдук, холобур, былырыын куонкурус кыайыылааҕа буолбут «Рак – приговор буолбат” бырайыактаах “Содействие” АНО рак ыарыыны утары охсуһар. «Саха-Азия оҕолоро» норуоттар икки ардыларынааҕы оҕо пуондата «Ийэни кытта Олох» бырайыакка дьиэ кэргэҥҥэ түүрэйи утары охсуһар. Өктөм нэһилиэгин сайыннарыы уопсастыбаннай пуонда «Креативная аграрная экономика In-agro» бырайыагы олоххо киллэрэр, онно оскуола оҕолоро оҕуруот аһын үүннэриигэ, тутааччы дьыалатыгар, мүөттээх тигээйини иитиигэ уонна да атын аграрнай дьоҕурга үөрэнэллэр.
Быйыл 27 муниципальнай оройуонтан уонна куораттааҕы уокуруктартан сайаапкалар ылылыннылар. Саамай көхтөөхтөрүнэн Горнай, Чурапчы, Ньурба, Сунтаар уонна Үөһээ Бүлүү улуустара буоллулар. Өрөспүүбүлүкэ киин куоратын туспа бэлиэтиир тоҕоостоох: Дьокуускай куорат 155 сайаапканы киллэрэн үрдүк көҕүн көрдөрдө.
Кыайыылаахтар 2026 сыл тохсунньу 1 күнүттэн бырайыактарын олоххо киллэрэн барыахтара. Билигин экспертэр саамай бастыҥ идеялары талаллар.
