16 От ыйа 16.07
  • 25°
  • $ 87,81
  • 95,78

Егор Борисов уу тырааныспарыгар сыһыаннаах этиилэрин РФ Госсэбиэтин президиума өйөөтө

17:11, 16 августа 2016
Читайте нас на
Яндекс Новости
ЯДВ

Владимир Путин салайыытынан атырдьах ыйын 15 күнүгэр Волгоград куоракка ыытыллыбыт Госсэбиэт президиумун мунньаҕар Саха сирин баһылыга Егор Борисов уу тырааныспарын сайыннарыы, хотугу улуустарга таһаҕаһы тиэрдиини өйөөһүн, флот туругун тупсарыы боппуруостарын көтөхтө. Егор Борисов чопчу этиилэрин Госсэбиэт өйөөтө уонна стратегическай суолталаах быһаарыылары ылалларыгар итилэри булгуччу аахсыахтарын туһунан эттилэр.


«Хоту сиргэ таһаҕаһы тиэрдиинэн хааччыллар сорох регионнарга уу тырааныспара ураты улахан суолталаах. Саха сирин баһылыгын Егор Борисовы кытта бу сарсыардаттан кэпсэтэбит. Онно кини эппитинэн, навигация этэҥҥэ барыан, барыта график быһыытынан туолуон сөп. Ол эрээри куруук итинник буолбат, онуоха өрүс туругуттан быһаччы тутулуктаныы баар», — диэн мунньах аһыллыытыгар Владимир Путин эттэ.

Дойду баһылыга бу салааны сайыннарыы сүрүн хайысхаларыгар тохтоото. Онуоха кини инфраструктураҕа баар мэһэйдэри, хаарчахтары туоратыыны, уу суолун көдьүүстээхтик туһаныыны, өрүс флотун саҥардыыны, тырааныспар бары көрүҥнэринэн таһаҕаһы тиэйии наадатын ойуччу тутан эттэ.

Ити этиллибиккэ судноны тутар тэрилтэлэр салайааччылара, регионнар баһылыктара, РФ бырабыыталыстыбатын чилиэннэрэ тыл эттилэр.

Саха сирин баһылыга Егор Борисов чопчу уонна чуолкай этиилэри киллэрдэ. Онно кини 2018 сылга күүһүгэр киириэхтээх техническэй регламеҥҥа сыһыаннаах кыһалҕаларга тохтоото.

«Биһиги икки эрэ судноны өрүскэ киллэрдибит. Оттон регламент быһыытынан 2018 сылга диэри 66 судноны үлэлэтиэхтээхпит. Онон техрегламеҥҥа сөптөөх болдьоҕу олохтуохха», — диэтэ кини.

Ил Дархан итини таһынан 600 тоннаҕа диэри таһаҕаһы көтөҕөр суднолары реестартан таһаарары туруоруста.

Хоту, Арктика улуустарыгар олоҕу хааччыйыыга хоту сирдэргэ таһаҕаһы тиэрдэр тэрилтэлэрин өйөөһүн улахан суолталааҕын ыйда.

«Владимир Владимирович, хотугу сиргэ таһаҕаһы тиэрдиини өйүүр биһиэхэ тыын суолталаах. Инвестиция тиийбэт, онон сир-уот, климат өттүнэн судургута суох регион буоларбыт быһыытынан, холобур НДС нолуогар чэпчэтии оҥоруохха сөп этэ. Итинтэн хаалбыт үбү флоту тупсарыыга, саҥардыыга ыытыах этибит. Саха сирин Өлүөнэ өрүһүн тардыыта РФ уопсай кэриҥин 23 бырыһыанын ылар. Бу олус улахан. Биһиэхэ тимир, массыына суоллара суохтар, онон уу тырааныспара соҕотох, альтернативата суох тырааныспар. Онон биһиги уустук балаһыанньабытын аахсаргытыгар көрдөһөбүн», — диэн Егор Борисов этии киллэрдэ.

Ону таһынан кини флоту тупсарыы үлэтин түргэтэтэри туруоруста. «Биһиги экономическай сайдыы, промторг министиэристибэлэрин кытта Жатайдааҕы судноны өрөмүөннүүр собуоту сөргүтэр инвестбырайыагы саҕалаатыбыт. Техрегламент ирдэбилин соруктарын толорор туһугар бу бырайыагы тэтимирдэргэ көрдөһөбүт», — диэтэ кини.

Дойду баһылыга ылыллар быһаарыылар баҕарбыт хоту олоххо киирбэттэрин эттэ.

«Экономическай үлэни ыытааччылар ыытар хайысхабытын дьэҥкэтик өйдүөхтээхтэр. Кинилэр онно бэлэм буолуохтаахтар, ону таһынан эрдэттэн былааны оҥоруохтаахтар. Ити былааннары олоххо киллэрэргэ дьулуһуохтаахпыт», — диэтэ президент.

Следите за самым важным и интересным в Telegram-канале и WhatsApp-группе ЯСИА