Саха сирин баһылыга ыам ыйын 10 күнүгэр халаан уутун содулларын туоратар уонна сэрэтэр боппуруостарга хамыыһыйа мунньаҕын ыытта.
Айсен Николаев бэлиэтээбитинэн, быһыы-майгы сылыктааһын быһыытынан бара турар. Миэстэлэргэ үлэ барыта былаан быһыытынан ыытыллар. Мунньах түмүгүнэн суолга уонна эмсэҕэлээбит нэһилиэктэргэ чөлүгэр түһэрэр үлэлэргэ кэккэ сорудахтар бэрилиннилэр.
«Оттук сезонун уһатыахха, дьон дьиэлэрин куурдуохтарын наада, хоромньуну ааҕыыга хамыыһыйа үлэтин түргэнник саҕалыахтаах. Уу кэлээри сылдьар оройуоннарга сэрэтэр, бэлэмнэнэр үлэни тэтимнээх соҕустук ыытыахха наада. Кылаабынайа — дьон олоҕор уонна доруобуйатыгар кутталлаах быһыы-майгы үөскээбэтин уонна хоромньу кээмэйин аччатар туһугар», — диэн Саха сирин баһылыга тоһоҕолоон бэлиэтээтэ.
This post was published on 10.05.2023 17:03 17:03