«Саха сирин уонна Татарстан икки ардыларыгар сыһыаннаһыы биһиги норуоттарбыт итэҕэлигэр, хардарыта ытыктабылыгар уонна культурнай уонна историческай чугастарыгар тутуллар. Биһиги араас эйгэҕэ бииргэ үлэлээһини утумнаахтык бөҕөргөтөбүт», — диэтэ Айсен Николаев.
Саха сирин баһылыга промышленнай кооперация суолтатын форумҥа тэриллибит быыстапканы холобурдаан бэлиэтээтэ.
«Форум быыстапкатыгар бииргэ үлэлээһин чуолкай холобурдарын көрөбүт: Саха сирин уонна Татарстан тэрилтэлэрэ бииргэ үлэлииллэр, оборудование уонна матырыйаал тиксэриитгэр. Ити регионнар икки ардыларынааҕы табаар эргиирин салгыы үүнэригэр тирэх оҥорор», — диэн эбэн эттэ Айсен Николаев.
Көрсүһүүгэ культура сибээстэрин сайыннарыыга ураты болҕомто уурулунна. Саха сирин баһылыга бу дьыл бэс ыйыгар Дьокуускайга уонунан тыһыынча ыалдьыты мунньан доҕордоһуу, хардарыта өйдөһүү дьиҥнээх бэлиэтэ буолбут үбүлүөйдээх XXV Федеральнай Сабантуй улахан ситиһиилээхтик ааспытын бэлиэтээтэ.
«Чуолаан бу бырааһынньык көмөтүнэн Дьокуускай куорат уонна Нижнекамскай муниципальнай оройуон делегацияларын икки ардыларыгар таһаарыылаах алтыһыы буолла, ол түмүгүнэн икки өрүттээх сибээһи сайыннарыы туһунан быһаарыы ылылынна. Бүгүн Дьокуускай куорат уонна Нижнекамскай муниципальнай оройуон икки ардыларыгар бырааттыы сыһыаны олохтуур туһунан Меморандумҥа илии баттанна», — диэн Айсен Николаев тоһоҕолоон бэлиэтээтэ.
Кини этэринэн, саҥа дуогабар бииргэ үлэлээһиҥҥэ эбии күүс биэриэхтэрэ уонна Саха сирин уонна Татарстан олохтоохторугар биллэр-көстөр туһаны аҕалыахтара.
Татарстан Өрөспүүбүлүкэтин раиһа Рустам Минниханов икки регион 2021 сылга илии баттаммыт бииргэ үлэлээһин туһунан бырабыыталыстыбалар икки ардыларынааҕы сөбүлэһиигэ тирэҕирэр урукку доҕордуу сыһыаны ситимниирин бэлиэтээтэ.
«Инники үлэҕэ улахан суолталаах хайысха — муниципальнай тэриллиилэр икки ардыларынааҕы бииргэ үлэлээһин. Биһиги сибээстэрбитин бөҕөргөтөргө Татарстан уонна Саха Өрөспүүбүлүкэтэ элбэх хайысхалаах диэн эрэнэбин. Саха сириттэн кэлбит коллегаларбыт нефтегазохимическай форумҥа кытталлар. Ону таһынан кинилэри Digital Week цифровой форумҥа эмиэ ыҥырдыбыт. Бу барыта биһиги регионнарбытыгар бииргэ үлэлиир соруктары быһаарыыга уонна уопут атастаһыыга көмөлөһөр», — диэн көрсүһүү түмүгүнэн Рустам Минниханов тоһоҕолоон бэлиэтээтэ.
