Саха сирэ Өлүөнэ муостатын тутууга федеральнай үбүлээһин сорҕотун эрдэлээн болдьоххо ылыан сөп. Бу туһунан боппуруоһу өрөспүүбүлүкэ баһылыга Айсен Николаев уонна Россия тырааныспарын миниистирэ Андрей Никитин көрсүһүүлэригэр дьүүллэстилэр.
Саха сирин баһылыга бырайыактааһын толору түмүктэнэрин туһунан иһитиннэрдэ уонна быйылгы тутуу бэлэмин туһунан кэпсээтэ, бырайыак кыраапыгынан олоххо киирэрин бэлиэтээтэ. Үбүлээһин болдьохторун эрдэ көһөрүү үлэ бэриллибит динамикатын оннунан хаалларарга, ону тэҥэ тутуу сыаната ыараабатын туһугар наадатын бэлиэтээтэ.
Маны таһынан көрсүһүүгэ Мохэ (КНР) — Дьэлиндэ – Аллараа Бэстээх – Өлүөнэ өрүс – Ньайба муора пуорда Трансарктическай тырааныспар көрүдүөрүгэр тахсыыга «Хотугу – Соҕуруу» тырааныспар суола тэриллиитин боппуруоһа көрүлүннэ.
«Бу хайысханы сайыннарыы — суол тутуута эрэ буолбатах, бүтүн Уһук Илин сүнньүнэн саҥа логистическай архитектураны тэрийии, — диэн тоһоҕолоон бэлиэтээтэ Айсен Николаев. — «Хотугу — Соҕуруу » көрүдүөр Кытай провинцияларыттан Арктикаҕа диэри кылгас суолу арыйыаҕа, Хотугу муора суолугар тахсыыны хааччыйыаҕа уонна Россия Хотугулуу-Илин сайдыытыгар тэтим биэриэ».
Тырааныспар миниистирэ Россия транспортнай каркаһын сайыннарыыга бэриллибит бырайыактар стратегическай суолталаахтарын бигэргэттэ уонна биэдэмистибэ Саха сирин салалтатын кытта салгыы бииргэ үлэлииргэ бэлэмин эттэ.
This post was published on 19.11.2025 11:09 11:09