Патриотическай иитии – гражданин буолуу төрдө. Бу туһунан атырдьах ыйын 20 күнүгэр гражданнары патриотическай иитиигэ Сүрүннүүр сэбиэт мунньаҕар Саха сирин баһылыга Айсен Николаева эттэ.
«Патриотическай иитии – гражданин буолуу төрдө. Биһиги бүгүн бары түргэн уларыйыы үйэтигэр олоробут. Биһиги Россиябыт историятын, кини үгэстэрин ытыктыырбыт, дойдубутугар тапталбыт бэйэбитин харыстыырга уонна уопсастыбабытын бөҕөргөтөргө көмөлөһөр», – диэн Саха сирин баһылыга тоһоҕолоон бэлиэтээтэ.
Айсен Николаев судаарыстыба уонна уопсастыба холбоһуктаах күүстэрэ эрэ эдэр көлүөнэ сайдыытын хааччыйар уонна төрөөбүт дойдуларыгар сыһыаннаах буолуу санаатын бөҕөргөтөр кыахтааҕын бэлиэтээтэ.
Мунньах сүрүн тиэмэлэринэн регионҥа патриотическай иитиини тэрийии, былаас органнара ДОСААФ-ны кытта бииргэ үлэлээһиннэрин уонна араас көрүҥнээх профилактическай учуокка турар саастарын ситэ илик оҕолору патриотическай хайысхалаах тэрилтэлэр үлэлэригэр сыһыарыыга дьаһаллары дьүүллэһии буолла.
Тэрээһиҥҥэ 2022 сылтан Саха сиригэр 598 уопсай үөрэх тэрилтэтигэр иитиигэ 766 сүбэһит үлэлиирин бэлиэтээтэ. Региоҥҥа 11 824 байыаннай-патриотическай кулууп, 11 075 эдэр армейскай этэрээт, 539 көрдүүр этэрээт, 258 кадетскай кылаас, 134 казактар түмсүүлэрэ үлэлииллэр. «Бастакылар Хамсааһыннара», «Авангард», «Юнармия» түмсүүлэр, «Буойун» киин уонна да атын тэрилтэлэр үгүс бырайыактарынан саҥа үөрүйэхтэри баһылаан, айар уонна тус кыаҕы олоххо киллэрэн, ситиһиилээх базаны тэрийиэхтэрин сөп.
Гражданнары патриотическай иитиигэ Сүрүннүүр сэбиэт чилиэннэрин этиилэрин истэн Баран, Саха сирин баһылыга оҕолору уонна ыччаты патриотическай иитиинэн хабар үлэни күүһүрдэргэ сорудах биэрдэ, ДОСААФ салалтатын кэккэ этиилэрин, ол иһигэр курсаннар баһылыыр байыаннай-учуоттуур идэлэрин ахсаанын элбэтиигэ өйөөтө.
«ДОСААФ-ны күүскэ сайыннарар, күүһүрдэр наада. Дойду Сэбилэниилээх Күүстэригэр көмөлөһөр, дойду көмүскэнэр кыаҕын уонна биһиги судаарыстыбабыт национальнай куттала суох буолуутун бөҕөргөтөр туһугар тэриллибит сыалын-соругун уопсастыба тутуһуохтаах», – диэтэ Айсен Николаев.
Санатан эттэххэ, Россия президенэ Владимир Путин «О национальных целях развития РФ на период до 2030 года и на перспективу до 2036 года» ыйааҕар 2030 сылга Россия культурнай уонна духуобунай үгэстэригэр олоҕуран сайдыылаах патриотическай личность иитиллэригэр усулуобуйаны тэрийэргэ сорудахтаата. Ити болдьоххо судаарыстыба баһылыга идэтийбит, тус сайдыытыгар уонна патриотическай иитиигэ туһуламмыт бырайыактарга, бырагыраамаларга кыттар эдэр дьон кырата 75% — ҥа диэри улаатыннарарга сорудахтаата.
