Муниципальнай депутаттар форумнара Нам оройуонугар тэрилиннэ. Атырдьах ыйын 28 күнүгэр ыытыллыбыт тэрээһиҥҥэ өрөспүүбүлүкэ баһылыга Айсен Николаев кытынна. Бу туһунан регион баһылыгын уонна бырабыыталыстыбатын пресс-сулууспата иһитиннэрэр.
Форум биир сүрүн тиэмэтэ 2025 сыл кулун тутар 20 күнүнээҕи олохтоох салайыныы туһунан федеральнайдааҕы сокуон буолла. Нуорма актатын сыалынан Саха сирин баһылыга муниципальнай былаас көдьүүһүн үрдэтиини уонна олохтоохтору кытта быһаччы сибээһин харыстааһыны ааттаата.
«Саҥа федеральнайдааҕы сокуон олохтоох салайыныы бэрэстэбиитэллээх органнарын бөҕөргөтүүнү көрөр. Нэһилиэк, бөһүөлэк, оройуон уонна куорат таһымнаах депутаттар статустара үрдүөҕэ. Сүрүнэ депутаттар дьоҥҥо өссө чугас буолалларыгар сытар», – диэн Айсен Николаев тоһоҕолоон бэлиэтээтэ.
Саха сирин баһылыга саҥа сокуон РФ бары регионнарын санааларын учуоттаан өр сыллаах үлэ кэнниттэн ылыллыбытын бэлиэтээтэ. «Сокуоҥҥа Арассыыйа президенэ илии баттаата уонна ону олоххо киллэриигэ биһиги бары эппиэтинэстээхпит. Федеральнайдааҕы сокуон сүрүн балаһыанньалара олоххо киирдилэр. Билигин биһиги иннибитигэр өрөспүүбүлүкэ нормативнай базатын саҥардыы соруга турар», – диэтэ Николаев.
Кини этэринэн, олохтоох салайыныы туһунан региональнай базовай сокуон 2025 сыл бүтүөр диэри ылыллыаҕа. «Историческай, социальнай-экономическай, географическай усулуобуйаларбытын учуоттаан, олохтоох салайыныы икки таһымнаах тиһигин харыстыахха наада дии саныыбын. Ол гынан баран, уларытыылары муниципалитет баһылыктарын талыы бэрээдэгэ ирдиир, бэрэстэбиитэллээх органнар оруолларын күүһүрдэр. Муниципальнай тэриллиилэр салалталарын тэрийиигэ маннык сыһыан олохтоох депутаттар бары олохтоохтор интэриэстэрин билиһиннэриигэ эппиэтинэстэрин үрдэтиэҕэ», – диэтэ Айсен Николаев.
Маны сэргэ муниципалитеттар боломуочуйаларын сөптөөх үбүлээһинэ суох аһара элбэтии кыһалҕата быһаарыллыаҕа. «Саҥа сокуон үбүлээһини кытта боломуочуйалары биэриини мэктиэлиир – итиэннэ муниципальнай тэриллиилэргэ олус улахан суолталаах», – диэтэ Айсен Николаев.
Ону таһынан Саха сирин баһылыга олохтоох салайыныы органнара, депутатскай корпуһу киллэрэн туран, кадрдары күүһүрдүүнү ирдииллэр. Бу боппуруоска Николаев Россия президенэ Владимир Путин анал байыаннай дьайыы кыттыылаахтарын салайар структураларга интеграциялааһын туһунан көҕүлээһинин өйөөтө.
«Итиннэ анал байыаннай дьайыы кыттыылаахтарыгар анаммыт “Саха сирэ — геройдар сирдэрэ» кадровай бырагыраама эмиэ туһуланар. Мин эһигиттэн анал дьайыы кыттыылаахтарын муниципальнай таһымҥа салайыыга, ол иһигэр бэрэстэбиитэллээх органнар үлэлэригэр кыттыыны ылалларыгар болҕомтону уураргытыгар көрдөһөбүн», — диэн форум кыттыылаахтарыгар өрөспүүбүлүкэ баһылыга туһаайан эттэ.
Айсен Николаев тыл этиитин түмүктүүрүгэр, былаас бары органнарын, ол иһигэр олохтоох органнар уопсай соруктарынан дьон-сэргэ чэгиэн-чэбдик буолуулара, уопсастыба биир сомоҕо буоларын тоһоҕолоон бэлиэтээтэ.
