Ил Дархан Айсен Николаев Дьокуускай куоракка тутулла турар эпос уонна искусство Арктикатааҕы киинигэр сырытта. Бу Уһук Илиҥҥэ биир бөдөҥ култуура эбийиэгэ буолар, регион бырабыыталыстыбатын уонна «ВИС» бөлөх икки ардыларыгар судаарыстыбаннай-чааһынай бииргэ үлэлээһин туһунан сөбүлэһиинэн тутуллар. Ол туһунан www.sakha.gov.ru саайт иһитиннэрэр.
Маннык таһымнаах култуура кластера ирбэт тоҥноох сиргэ аан бастаан тутуллар. Сүрүн конструкциялары тутуу түмүктэннэ, ону тэҥэ фасад үлэлэрэ ыытылыннылар. Дьиэ ис-тас оҥоһуута салҕанар, инженернэй систиэмэлэри уонна лифт оборудованиеларын таҥааһын, 2-тэн 10-ка диэри этээскэ үлэҕэ киирдэ. Киин холлга панорамнай лифт таҥыллар, эскалатордар туруоруллаллар.
«Үлэ ирбэт тоҥ усулуобуйатыгар барар, онон хаачыстыбаҕа, тутуу эрэллээх, чуолкай буоларыгар ирдэбил саамай үрдүк. Киин премьералар ыытыллыахтара, симфоническай уонна национальнай музыка истиэхпит, тыйаатыр сайдар уонна биһиги эпоспыт нэһилиэстибэтэ харыстанар, Россия уонна аан дойду таһымнаах бөдөҥ тэрээһиннэр ыытыллыахтара», — диэн Айсен Николаев бэлиэтээтэ.
Эбийиэккэ 100-чэкэ киһи, 5 техника үлэлиир. Муҥутуур үлэ кэмигэр дьон ахсаана 860-ка тиийэ элбиэҕэ. Саха сирин баһылыга үлэ хаачыстыбатын уонна бары быһаарыылар сөптөөх буолууларын куруук хонтуруолга тутарга сорудахтаата.
Итини сэргэ, киин үлэтин бастакы күнүттэн туруктаах тэрээһини хааччыйар кыахтаах идэтийбит хамаандалар үлэҕэ киирэллэригэр сорук туруорда.
Култуура кластерга судаарыстыбаннай филармония, икки театральнай, репетиционнай уонна сиэр-туом саалалара туруохтара. Арктика киинэ бэйэтин хааччыллыытынан Саха сирин культурнай эрэ буолбакка, бэрэстэбиитэллээх киинэ буолуоҕа, кини өрөспүүбүлүкэни федеральнай уонна норуоттар икки ардыларынааҕы таһымнаах улахан тэрээһиннэр бэбиэскэлэригэр киллэрэр кыаҕы биэриэҕэ.
This post was published on 09.02.2026 11:15 11:15