Саха сирин баһылыга Дьокуускай мэрин кытта оробуочай көрсүһүүнү ыытта. Өрүттэр тирээн турар суолталаах боппуруостары дьүүллэстилэр, ол иһигэр оттук сезонун.
Евгений Григорьев куорат хомунаалынай хаһаайыстыбатын кыстыкка бэлэмин уонна билиҥҥи туругун туһунан Айсен Николаевка сиһилии отчуоту билиһиннэрдэ.
Ону таһынан көрсүһүү кэмигэр куорат нэһилиэнньэтин олоҕун хаачыстыбатын тупсарыыга туһуламмыт национальнай бырайыактар олоххо киириилэрин билиҥҥи түһүмэхтэрэ көрүлүннүлэр. Сүрүн бырайыактар ортолоругар — саҥа оскуолалары, оҕо саадтарын, спортивнай эбийиэктэри уонна медицинскэй тэрилтэлэри тутуу.
Куорат инфраструктуратын сайыннарыы боппуруостарын дьүүллэһии чэрчитинэн Айсен Николаев тутууга көҥүл биэрии кээмэйин кыччатыы кыһалҕатын санатта, ити Дьокуускайга 2028-2029 сылларга саҥа дьиэни киллэриини аҕыйатыан сөп.
Бу кыһалҕаны быһаарарга мэр кэккэ этиилэри билиһиннэрдэ, олор истэригэр тутааччылары кытта бииргэ үлэлээһин саҥа механизмнарын киллэрии, инженернэй инфраструктураны сайыннарыы уонна сир учаастактарын биэрии процедураларын судургутутуу.
Итини сэргэ Дьокуускай маастар-былаанын олоххо киллэрии болҕомто киинигэр баар. Бу стратегическай докумуон куорат эйгэтин уһун болдьохтоох былааннааһын, территориялары кэлимник сайыннарыы уонна куорат олохтоохторун олохторугар табыгастаах усулуобуйаны тэрийии акылаата буолар.
“Өрөспүүбүлүкэ киин куораты сайыннарыы приоритетнай соруктарын быһаарыыга куораты кытта бииргэ үлэлэһэн, утумнаахтык уонна дьиҥнээх кыахтарга тирэҕирэн барарын туһугар салгыаҕа», — диэн Түмүктээтэ Айсен Николаев.
