Саха сирин баһылыга Айсен Николаев 2026 сылга уонна 2027-2028 сыллар былааннаах кэмнэригэр судаарыстыбаннай бюджет туһунан сокуон бырайыагын иккис ааҕыыга бэлэмнээһиҥҥэ аналлаах Судаарыстыбаннай Мунньах (Ил Түмэн) салалтатын кытта үлэ көрсүһүүтүн ыытта.
Айсен Николаев үп кылаабынай докумуона олус судургута суох усулуобуйаҕа ылылларын бэлиэтээтэ, ол кэккэ фактордартан тутулуктаах. Кини Юрий Николаев салайааччылаах бюджет, үп, нолуок уонна сыана бэлиитикэтигэр, бас билии уонна приватизация боппуруостарыгар кэмитиэт ураты кылаатын тоһоҕолоон бэлиэтээн туран, туох баар депутатскай корпуска уонна сис кэмитиэттэргэ үлэлэрин иһин махталын биллэрдэ.
Депутаттар өрөспүүбүлүкэ бырабыыталыстыбатын, профильнай министиэристибэлэр уонна биэдэмистибэлэр салайааччыларын кытта бииргэ бу күннэргэ регион үбүн бэлиитикэтин чугастааҕы сылларга быһаарар тутаах сокуон барылларын көрдүлэр. Сөбүлэһиннэрэр хамыыһыйалар мунньахтарыгар Саха сирин чугастааҕы үс сылга бюджетын туһунан сокуон барылыгар 700-тэн тахса уларытыы көрүлүннэ. Федеральнай бюджеттан 28 млрд солк.суумалаах эбии дохуоту үллэриигэ, ону тэҥэ норуот депутаттарыттан киирбит 270-ча уларытыыга ураты болҕомто уурулунна.
Ороскуот уопсай кээмэйэ 2026 сылга 345 млрд 347 мөл. солк. буолуоҕа. Улахан аҥара үгэс быһыытынан социальнай эйгэҕэ, ол иһигэр доруобуйа харыстабылыгар, үөрэххэ уонна социальнай көмүскэлгэ тыырыллар.
Парламентарийдары кытта көрсүһүүгэ Айсен Николаев хомунаалынай комплекс тэрилтэлэригэр субсидия боппуруостарыгар болҕомтотун уурда. Бюджет бырайыагар бу сыалга дьүүллэһии түмүгүнэн 45 млрд солк. кэриҥэ көрүллүбүт, ол ороскуот бүттүүнүн сууматын 1/7-гэ тэҥнэһиэҕэ.
Көрсүһүү кыттыылаахтара агропромышленнай комплексы үбүлээһин боппуруостарын туспа кэпсээтилэр. Өрөспүүбүлүкэ баһылыга тыа хаһаайыстыбатын үбүлээһин былырыыҥҥы таһымынан хааларын хааччыйарга бэлиэтээн эттэ. Итини сэргэ авиация боппуроустарын кэмигэр тэрийии көрүлүннүлэр.
2026 сылга уонна 2027 уонна 2028 сыллар былааннаах кэмнэригэр Саха сирин судаарыстыбаннай бюджетын туһунан сокуон барылын иккис ааҕыыга сэтинньи 26-27 күннэригэр Ил Түмэн уон бэһис (уочараттаах) пленарнай мунньаҕар (Ил Түмэн) көрүөхтэрэ.
This post was published on 25.11.2025 11:03 11:03