Новочебоксарскайга олунньу 1-6 күннэригэр ПОДА спортсменнарын ортолоругар чэпчэки атлетикаҕа Россия Кубога ыытыллыаҕа. Саха сирин сүүмэрдэммит хамаандатын састаабыгар хамаанда түөрт лидердэрэ кыттыаҕа диэн ЯСИА иһитиннэрэр.
Ядроны анньыыга аан дойду чемпионатын призера Айаал Сивцев уонна дойду рекордсмена Виктория Петрова кыттарга бэлэмнэнэллэр. Россия хас да төгүллээх чемпиона Саргылан Семенов 200 уонна 400 миэтэрэ сүүрүөҕэ. Россия Кубогын кыһыл көмүһүн эмиэ ыларга Роман Ибрагимов кыһаллыаҕа. Кини 60 миэтэрэ сүүрүүгэ уонна уһуну ыстаныыга тахсыаҕа.
«Бу күрэхтэһии спортсменнарга рейтиннэри биэрэр чугастааҕы норуоттар икки ардыларынааҕы стартарга Россия сүүмэрдэммит хамаандатын састаабын быһаарыаҕа. Биһиги түөрт спортсмеммыт дойдуга эрэ буолбакка, Европаҕа уонна аан дойдуга фавориттар ахсааннарыгар киирэллэр», — диэн хамаанда сүрүн тренерэ Василий Оленов ЯСИА кэпсээтэ.
This post was published on 19.01.2026 15:01 15:01