Саха сирин Арктикатын оройуоннарыгар субсидиялаах авиакөтүүлэри сыл бүтүөр диэри сөргүтүөхтэрэ. Бу туһунан алтынньы 30 күнүгэр өрөспүүбүлүкэ тырааныспарга миниистирэ Владимир Сивцев суруналыыстарга кэпсээтэ.
«Бүгүн субсидиялаах авиабилиэттэр боппуруостарыгар үп-экономическай блок кыттыылаах сүбэ мунньах буолан ааста. Сыл бүтүөр диэри тустаах үп-харчы көрүллэригэр этии баар. Чопчу болдьохторо биллибэт, үбүлээһин источниктарын көрдөөһүҥҥэ күүстээх үлэ барар. Саҥа дьылга, биллэн турар, таһыы сөргүтүллүөҕэ», — диэн Владимир Сивцев быһаарда.
Санатар буоллахха, Саха сирин баһылыга Айсен Николаев регион бырабыыталыстыбатыгар 2025 сылга эбии үп көрүллэригэр сорудах биэрбитэ. Быйылгы бюджетка авиабилиэти субсидиялааһыҥҥа көрүллүбүт үп түргэнник бүттэ. Ол эрээри регион бырабыыталыстыбата үөскээбит быһыыны-майгыны быһаарарга кэмигэр дьаһал ылымматах.
Регион баһылыга 2026 сыл бюджетыгар бу хайысханан үбүлээһин «сөптөөх кээмэйгэ» ылыллыахтаах диэн эттэ.
This post was published on 31.10.2025 10:38 10:38