Саха сирин Арктикатын оройуоннарыгар тыын суолталаах бородууксуйаны атыылаһыы түмүктэннэ. Билигин сүрүн соругунан ити табаары көдьүүстээхтик тиэрдиини тэрийии буолар, — диэн өрөспүүбүлүкэ бырабыыталыстыбатын бэрэстээтэлин солбуйааччы Ольга Балабкина «Саха» НКИК телеханаалыгар эрэгийиэн судаарыстыбаннай былааһын ситэриилээх органнарын үлэлэрин түмүк отчуотун кэмигэр иһитиннэрдэ.
«Наадалаах бородууксуйа барыта атыылаһылынна. Билигин сүрүн сыалбыт-сорукпут логистиканы олохтуур уонна Арктика олохтоохторугар табаары кэмигэр тиэрдиини хааччыйыы буолар, манна бары федеральнай ирдэбиллэри тутуһабыт», – диэн Ольга Балабкина тоһоҕолоон бэлиэтээтэ.
Кини былырыын өрөспүүбүлүкэа бары Арктика оройуоннарыгар эргиэн-логистика кииннэрэ үлэлээбиттэрин санатта. Итини сэргэ эрэгийиэн үп-харчы ыарахаттарыгар түбэһэн, быйыл тиэйии-таһыы дьаһала саҕаланар болдьоҕо хойутаан көһөрүллүбүтүн эттэ.
«Бүгүн биһиги Арктика зонатын олохтоохторун сөптөөх уонна хаачыстыбалаах аһылыгынан хааччыйар туһугар, нолуок усулуобуйатын уларытыынан сибээстээн, коммерческай тэрилтэлэри уонна урбаанньыттары кытта бииргэ үлэлээһин варианнарын көрөбүт», — диэн Балабкина эттэ.
