Саха сиригэр ититии сезонугар бэлэмнэнии график чэрчитинэн баран иһэр. Бу туһунан атырдьах ыйын 21 күнүгэр «Прямой разговор» биэрии быһа эфиригэр Саха сирин баһылыга Айсен Николаев эттэ, СИА суруйар.
«Биһиги өрөспүүбүлүкэбитигэр балаҕан ыйын 1 күнүгэр диэри ититиини маассабай үлэҕэ киллэрэргэ бэлэм буолуохтаахпыт. Кэккэ оройуоннарга оттук сезона номнуо саҕаланна. Билиҥҥи туругунан ититии сезонугар бэлэм көрдөрүүтэ 80 %-тан тахса, барыта графигынан баран иһэр», — диэтэ Айсен Николаев.
Билигин Саха сирин түөрт оройуонугар — Аллайыахаҕа, Анаабырга, Булуҥҥа уонна Аллараа Халымаҕа ититиини киллэрдибит. Кыстык иннинэ олорор дьиэ-коммунальнай хаһаайыстыба 800-тэн тахса эбийиэгэ өрөмүөннэннэ. Билигин ситими өрөмүөннээһин салгыы бара турар, диэн аҕа баһылык бэлиэтээтэ.
