Диспансеризацияны уонна профилактическай медицинэ көрүүтүн 2025 сыллаахха Саха сиригэр 400 000 тахса киһи ааста. Бу туһунан өрөспүүбүлүкэ доруобуйа харыстабылын министиэристибэтигэр иһитиннэрдилэр.
Быраастар ыарыы 9297 аан бастакы түбэлтэтин буллулар, ол иһигэр 357 — саҥа үөскээбит искэн, 3097 — сүрэх-тымыр систиэмэтин ыарыылара, 714 — сахарнай диабет, 642 — ас буһарар уорганнар патологиялара, 381 — тыынар уорганнар патологиялара.
Онуоха доруобуйа I бөлөҕөр (практически здоровые) бэрэбиэркэ ааспыт дьон 18,9% — нара эрэ киирдэ. II бөлөх доруобуйалаах (ыарыы сайдыытын куттала баар) өлүүтэ 22% тэҥнэстэ. III бөлөх (куруук кэтээн көрүү эрэйиллэр хроническай ыарыылар бааллар) 59% олохтонно.
Саха сирин олохтоохторугар маннык кыһалҕалар ордук элбэхтик көстөллөрүн ырытыы көрдөрдө:
сыыһа аһааһын — 52,4%;
хамсаныы кырата — 47,4%;
үрдүк холестерин таһыма — 29,2%.
«Хроническай ыарыылаах, куттал фактордаах дьону билиигэ диспансеризацияны тиһигин быспакка ааһыы суолталаах, наадата бигэргэннэ, – диэн Саха сирин доруобуйа харыстабылын миниистирэ Лена Афанасьева бэлиэтээтэ. — Ылыллыбыт түмүктэр — өрөспүүбүлүкэ доруобуйа харыстабылын тиһигэр чуолкай хайысханы биэрэллэр. Биһиги профилактическай хайысханы сайыннарыыга, диспансернай кэтээн көрүү таһымын үрдэтиигэ үлэни салҕыахпыт».
Мэлдьи көрүү-истии омук доруобуйатын харыстыыр биир саамай дьайыылаах ньыманан буолар. Саха сирин доруобуйа харыстабылын министиэристибэтэ өрөспүүбүлүкэ бары олохтоохторун доруобуйаларыгар эппиэтинэстээхтик сыһыаннаһалларыгар уонна сыл аайы олорор сирдэринэн поликлиникаларга медкөрүүнү ыыталларыгар ыҥырар.
Профилактическай дьаһаллар РФ президенэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн олоххо киирэллэр.
Санатан эттэххэ, Саха сиригэр босхо диспансеризацияны субуотаҕа барыахха сөп.
This post was published on 16.01.2026 11:12 11:12