Саха сиригэр «Култуура» национальнай бырайыак үлэтэ салҕанар. 2023 сылга өрөспүүбүлүкэҕэ саҥа виртуальнай кэнсиэр саалата арыллыаҕа, СИА-ҕа култуура министиэристибэтэ иһитиннэрдэ.
Култуура миниистирин солбуйааччыта Марина Силина эппитинэн, саҥа виртуальнай кэнсиэр саалата Өлүөхүмэтээҕи оҕо искусствотын оскуолатыгар быйыл арыллыаҕа. «Бу көҕүлээһиҥҥэ 1 мөл солк федеральнайдааҕы уонна 100 тыһ солк регионнааҕы бюджеттартан тыырылынна», — диэтэ Силина.
Саҥа киэптээх саала арыллыыта искусство оскуолатын сайдыытыгар суолталаах хардыы буолар. Оҕолор биллиилээх музыканнар уонна бөлөхтөр кэнсиэртэрин улахан экраҥҥа үчүгэй тыаска-ууска, быһа да, эрдэ уһуллубуту да көрүөхтэрэ.
Алдаҥҥа арыллыбыт бастакы виртуальнай кэнсиэр саалата наадалааҕын, туһалааҕын дакаастаата. 2022 сылга 18 трансляция таҕыста, ол иһигэр тыа сирин оскуолаларыгар. 600-тэн тахса киһи көрдө.
This post was published on 09.02.2023 14:31 14:31