2024 сыл бүтүөр диэри Саха сирин ветеринариятын сулууспаларын модернизациялааһын бырагырааматын ылыныы былааннанар. Онуоха материальнай-тиэхиньиичэскэй базаны саҥардыы көрүллэр.
Ол туһунан СӨ бырабыыталыстыбатын бэрэссэдээтэлин солбуйааччы Сергей Местников СӨ ветеринарияҕа департаменын 2023 сыл түмүгүнэн сэминээр-мунньаҕар иһитиннэрдэ.
Сергей Местников бэлиэтээн эппитинэн, өрөспүүбүлүкэ бырабыыталыстыбата эрэгийиэн ветеринарияҕа сулууспаларын сайыннарар уонна кыһалҕалаах боппуруостары быһаарар былааннаах. Кини бэлиэтээбитинэн, билигин сүрүн кыһалҕалара – каадырынан ситэ хааччыллыбат буолуу уонна материальнай-тиэхиньиичэскэй база эргэриитэ.
«Билигин ветеринария департамена биһиги өрөспүүбүлүкэбит ветеринарияҕа сулууспаларын модернизациялааһын бырагырааматын бэлэмнээһининэн дьарыктанар. Онуоха кэлэр биэс сылга 850 мөлүйүөн курдук сууманы инвестициялыахха наада. Биһиги булгуччу итинник бырагырааманы олоххо киллэриэхтээхпит, тоҕо диэтэххэ, ол — бириэмэ ирдэбилэ», – диэн Сергей Васильевич бырагырааманы 2024 сылга бигэргэтэргэ былааннаналларын эттэ.
Кини ону таһынан ветеринария сулууспаларын хотугу салааларын статуһун көрүү, каадырдары сайыннарыы боппуруостарын быһаарарга эттэ, суруйда Саха сирэ саайт.
