400 киһи олорор Березовка сэлиэнньэтигэр эбээннэр олороллор. 2002 сылтан саҕалаан бу нэһилиэнньэлээх пууҥҥа куруук халаан буолар.
2017 сыллааҕы халааҥҥа Березовкаҕа 54 ыал эмсэҕэлээбитэ, 37 олорор дьиэ уонна кэккэ социальнай эбийиэктэр ууга барбыттара. Былырыыҥҥы сыллааҕы халаан содулун туоратыыга өрөспүүбүлүкэ бүддьүөтүттэн 121 солк көрүллүбүтэ. Былырыын Березовкаҕа сырыытын түмүгүнэн Егор Борисов биэс сыл устата сэлиэнньэни уу ылбат үрдүк сиригэр көһөрөргө этии киллэрбитэ.
Саха сирин бырабыыталыстыбатын бэрэссэдээтэлин бастакы солбуйааччы Алексей Колодезников бэлиэтээбитин курдук, бырабыыталыстыба көһөрүү былаанын ылыммыта. Саҥа сиргэ икки кыбартыыралаах дьиэлэри, 35 миэстэлээх оҕо саадын, биэлсэр пуунун, сэлиэнньэ дьаһалтатын дьиэтин тутуохха, 2 №-дээх хочуолунайы уларытан оҥоруохха наада.
«Березовкаҕа дьиэлэри тутууга өрөспүүбүлүкэ бүддьүөтүгэр 42 мөл солкуобайы көрбүппүт. Сайын Орто Халымаҕа 12 дьиэ кэмпилиэгин аҕалыахпыт, суол турдаҕына Березовкаҕа тиэрдиэхпит. Билигин сэлиэнньэҕэ саҥа дизельнэй ыстаансыйа тутуллар«, – диэн кэпсээтэ бырайыак олоххо киириитин туһунан Алексей Колодезников.
Бу күннэргэ Алексей Колодезников салалталаах бырабыыталыстыба бөлөҕө Березовкаҕа сырытта.
СИА.
This post was published on 20.04.2018 12:22 12:22