Бырабыыталыстыба бэрэссэдээтэлин бастакы солбуйааччыта Дмитрий Садовников эппитинэн, уу түстэ да нэһилиэнньэлээх пууннары чөлүгэр түһэрии үлэтэ саҕаланыаҕа.
Билигин тоҕус быстах кэмҥэ олорор пуун тэрилиннэ, 672 киһиэхэ анаммыт. Өймөкөөҥҥө 33 киһи онно киирдэ, 52 киһи аймахтарынан тарҕаста.
Өймөкөөн оройуонун Орто-Балаҕан сэлиэнньэтигэр сүөһүнү үрдүк сиргэ таһаардылар.
Томпо оройуонун туһаайыытынан Алдан өрүскэ уу таһыма кыралаан тахсар, ити эрээри ууга барбыт учаастактар бэлиэтэммэтилэр.
Кыһалҕалаахтарга көмөҕө быыһааччылардаах үс салгын суудуната көттө. 3,3 туонна гуманитарнай таһаҕас өрөспүүбүлүкэ сапааһыттан тириэрдилиннэ. Халаан содулун аҕыйатар сыалтан, бары сулууспалар ситимнээхтик үлэлииллэр.
Чаас аайы регион баһылыгар баар балаһыанньа отчуоттанар.
This post was published on 16.07.2025 19:37 19:37