Баһаар куттала үөскүүр саҥа сезонугар ойуурга уоттан харыстанар сир иэнин 10,3 мөл.гектарга улаатыннарар былаан турар. Ол туһунан олунньу 26 күнүгэр «Актуальное интервью» биэриигэ өрөспүүбүлүкэ экологияҕа, айылҕаны туһаныыга уонна ойуур хаһаайыстыбатыгар миниистир Евгений Перфильев иһитиннэрдэ.
Эрдэ баһаартан 71,8 мөл. гектары араҥаччылыыр эбит буоллахтарына, быйылгыттан 82,1 мөл. гектары хабыахтара.
«Биһиги харыстанар сирбитин 10 мөлүйүөн гектарынан элбэтэбит. Бу олус улахан суолталаах, дойду үгүс субъектарын иэнэ итинтэн кыра», — диэн миниистир тоһоҕолоон бэлиэтээтэ.
Евгений Перфильев өрөспүүбүлүкэҕэ минерализацияламмыт балаһалары, баһаары утары араарыылары уонна айылҕа ууларын, маһы ыраастааһыны ыытыы курдук олус наадалаах тэрээһиннэр ыытыллалларын кэпсээтэ.
«Сезоҥҥа бэлэмнэнии чэрчитинэн “Авиалесоохрана” саҥа үлэһиттэригэр үөрэтии ыытыллар, ол иһигэр парашюттан ыстаныыга уонна бөртөлүөттэн түһүүгэ эрчиллии. Итини тэҥэ техническэй хааччыйыыга болҕомто ууруллар: техника өрөмүөннээһинэ уонна техкөрүүнү ааһыыта, ол кини уустук усулуобуйаҕа үлэҕэ бэлэмнээх буоларын мэктиэлиир. Регионнааҕы “Авиалесоохрана” үлэһитин ахсаана 156 киһинэн элбиэҕэ, Арктика оройуоннарыгар икки саҥа авиаотделение аһыллыаҕа – Эдьигээҥҥэ уонна Орто Халымаҕа, урут итинник үлэ ыытыллыбатаҕа», – диэн Евгений Перфильев кэпсээтэ.
Былырыын икки саҥа авиаотделение тэриллибитэ – Витимҥэ уонна Саҥыйахтаахха. 2027 сылга Абый улууһугар Белогорскайдааҕы авиаотделение аһыллара былааннанар.
Маны сэргэ былырыын Таатта оройуонугар ойуур баһаарынай ыстаансыйата тутуллубута, оттон быйыл Амма уонна Чурапчы улуустарыгар саҥа ыстаансыйалары тутуу былааннанар. Бу эбийиэктэр ойуур баһаарыгар суһаллык эппиэттиир наадалаах техниканан, оборудованиенан хааччыллыахтара.
Санатан эттэххэ, Ил Дархан Айсен Николаев өрөспүүбүлүкэ парламеныгар Туһаайыытыгар дойду президенэ Владимир Путин өйөбүлүнэн уонна сэрэтэр үлэҕэ ситимнээхтик сыһыаннаһан, өрөспүүбүлүкэҕэ ойуур баһаарын балаһыанньата уларыйбытын тоһоҕолоон бэлиэтээтэ. 2025 сыллаахха ойуурдарга ыксаллаах быһыы-майгы эрэһиимэ аан бастакытын биллэриллибэтэҕэ. Ойуур баһаарын иэнэ 160 тыһыынча гектарга тиийэ кыччаата, ити урукку сыллардааҕар уонча төгүл кыра. Бастакы суукка устата бары баһаар 63% — на суох буолар. Бу 2021 сыллааҕар сэттэ төгүл үчүгэй, ыйыллыбыт сылга баһаартан кутталлаах сезон саамай уустук буолбута.
This post was published on 27.02.2026 10:11 10:11