Саха сиригэр Уһук Илин бастакы ыччат симфоническай оркестрын тэрийэр туһунан Ил Дархан Айсен Николаев уонна Саха сирин музыка үрдүкү оскуолатын ректора Надежда Зайкова кэпсэттилэр. Ол туһунан регион салалтатын пресс-сулууспата суруйда.
Дьокуускай куоракка бэс ыйын 23 — 30 күннэригэр буолар «Симфония добра» норуоттар ардыларынааҕы музыка толоруутун куонкурсун 60 кыайыылааҕа оркестр састаабыгар киириэҕэ. Кинилэр бэстибээл гала-кэнсиэригэр кыттыахтара.
«Симфоническай оркестры тэрийии музыка үөрэҕэр кылааты киллэрэрин таһынан, регионнар култуураларыгар бииргэ үлэлээһиҥҥэ Уһук Илин субъектарын, Россия Арктикатын зонатын уонна Азиатскай-Тихоокеанскай регион дойдуларын сибээстэрин бөҕөргөтүөҕэ», – диэтэ Айсен Николаев.
Санаттахха, 2024 сыл бэс ыйын 18 күнүгэр Владимир Путин музыка үрдүкү оскуолатыгар сылдьыбыта.
This post was published on 20.02.2025 15:08 15:08