Саха Сиригэр быйыл тыа хаһаайыстыбатын оҥорон таһаарыытыгар 15 научнай арыйыыны, ол иһигэр М.Г. Сафронов аатынан Саха сиринээҕи тыа хаһаайыстыбатын института уонна Арктикатааҕы судаарыстыбаннай агротехнологическай университет учуонайдара айбыт бырайыактарын олоххо киллэрии түмүктэнэр. 2019 сылтан 2024 сылга диэри үлэҕэ барыта 25 арыйыы киирдэ.
Өрөспүүбүлүкэ агропромышленнай комплексын салааларын научнай-техническэй өрүтүгэр хааччыйыы боппуруостарын Саха сирин бырабыыталыстыбатын бэрэссэдээтэлин солбуйааччы Сергей Местников мунньаҕар көрдө.
«Бырайыактар бары өрөспүүбүлүкэбитигэр улахан суолталаахтар. Учуонайдар арыйыыларын практикаҕа ханнык баҕарар хаһаайыстыба холобуругар киллэриэххэ сөп. < … > Биһиги бу научнай үлэлэри өрөспүүбүлүкэ үрдүнэн киэҥник олоххо киллэриигэ көһүөхпүтүн наада. Ил Дархан Айсен Николаев олохтоох оҥорон таһаарыыны сайыннарыы туһунан стратегическай ыйааҕын толоруу ситиһиитэ мантан тутулуктаах буолуоҕа», — диэтэ Сергей Местников.
Быраыыталыстыба бэрэссэдээтэлин солбуйааччы Саха сиринээҕи тыа хаһаайыстыбатын министиэристибэтигэр 2026 сылтан үлэлиир научнай арыйыылары киллэрии былаанын, регион бөдөҥ тыа хаһаайыстыбатын улуустарыгар болҕомтону ууран оҥорорго сорудахтаата.
Судаарыстыбаннай научнай-техническэй бэлиитикэ тыа хаһаайыстыбатын сайыннарыы интэриэһигэр РФ президенэ Владимир Путин ыйааҕынан сөп түбэһиннэрэн, 2017-2025 сылларга тыа хаһаайыстыбатын сайыннарыы федеральнай научнай-техническэй бырагырааматын чэрчитинэн олоххо киирэр.
