Ил Дархан Айсен Николаев эппитинэн, пуорумҥа 2600 киһи кэллэ, Россия араас регионнарыттан.
«Бу аата биһиги пуоруммут ситиһиитэ уонна креативнай индустрияҕа цифровой сайдыы ситиһиилээхтик барарын бэлиэтэ. Дьон биһиэхэ уопут атастаһа, ситиһиитин кэпсии уонна биһиги үлэбитин көрө кэлэр. Санаа атастаһыытыгар уонна практикаларга биһиги дойдубут кыаҕа уонна өрөспүүбүлүкэ цифровой сайдыыта көстөр.
Россия президенэ Владимир Путин биһиги инновационнай экосистиэмэҕэ, цифровой уонна креативнай индустрияҕа, ол иһигэр анал байыаннай дьайыыга өйөбүлгэ, ситиһиилэрбитин үрдүктүк сыаналаабыта. Саха сирин технологическай хампаанньалара сэбилэниилээх күүстэр туһаналларыгар табаары оҥорон таһаараллар. Биһиги креативнай индустриябыт хайдах курдук көхтөөхтүк сайдан иһэрин көрөбүн. Билигин биһиги бу эйгэ киинигэр баарбыт — Үлэ кыбаарталыгар. Анимацияҕа уонна айар хайысхаларга саҥа сүүрээннэр киирэллэриттэн мин үөрэбин. Бастыҥ бырайыактар оҥоһуллаллар, саҥа киинэлэр, сотору кэминэн Москваҕа биһиги Запорожскай уобалаһы кытта кыттыгастаах «Алдан» диэн бырайыакпыт көрдөрүллүөҕэ. Билигин киинэ делегацията Дьокуускайга баар, пуорумҥа кыттар», – диэтэ регион салайааччыта.
Кини ВОЛС көмөтүнэн эдэр дьон цифровой индустрияҕа бастакы хардыылары оҥороллорун бэлиэтээтэ.
Пуорум кэмигэр топ-менеджердар араас хайысхаҕа 40-тан тахса тэрээһин ыытыахтара, олохтоох исписэлиистэргэ анаан. Сүрүн тиэмэ — регионнар цифровой трансформациялара дойду сайдыытын приоритета.
Бу күн «Сбербанк» ПАУо управляющайа Иван Федюк уонна Россия Геройа, бастакы кылаастаах космонавт-чинчийээччи Олег Артемьев бааллар. Артемьев космоска көтө сылдьыбыт Кындыкаан куукуланы спортивнай-үҥкүү куонкурустарын элбэх төгүллээх чемпионкатыгар, норуоттар ардыларынааҕы уонна Россия күрэхтэһиилэрин гран-при хаһаайкатыгар Айилина Давыдоваҕа туттарда.
This post was published on 12.11.2024 14:02 14:02