Саха сиригэр «Цифровой алмаас» IV федеральнай форум саҕаланна. ЯСИА тэрийээччилэр иһитиннэрбиттэринэн, тэрээһин Россия 70 регионуттан икки тыһыынчаттан тахса кыттааччыны, ону тэҥэ Кытайтан, Индияттан, Казахстантан уонна Узбекистантан ИТ-салаа бастыҥ исписэлиистэрин түмтэ.
«Сыыппара билигин үлэни, дьиэни кытта сибээстээх ханнык баҕарар дьайыылар быстыспат элеменнэрэ буолар. Биһиги сорукпут – олох өссө судургутук, тупсаҕай буоларын туһугар туох эрэ саҥаны оҥоруу, ити эрээри киһи толкуйдуурун тохтоппот гына оҥоруу», — диэтэ форум аһыллыытыгар Саха сирин пбырабыыталыстыбатын бэрэссэдээтэлэ Кирилл Бычков.
Быйылгы «Цифровой алмаас» сүрүн тиэмэлэрэ цифровой трансформация сүрүн хайысхаларын хабыахтара:
поддержку инициатив молодых специалистов.
сибээс сайдыыта уонна телекоммуникация инфраструктуратын саҥардыы;
аныгы дата-кииннэри тэрийии;
пилота суох ситимнэри киллэрии, судаарыстыба биир кэлим цифровой архитектуратын үөскэтии;
эдэр исписэлиистэр көҕүлээһиннэрин өйөөһүн.
Форум дьыалабыай бырагырааматыгар 100-тэн тахса тэрээһин киирэр. Ленскэйгэ ИТ-киини арыйыы, Тинная — Турукта волоконнай-оптическай сибээс линиятын үлэҕэ киллэрии, Арктикаҕа майнинг дата-кииннэрин инники кэскилин туһунан төгүрүк остуол уонна пилота суох авиацияҕа панельнай сессиялар улахан суолталаах событиеларынан буолуохтара. Ону тэҥэ «Полярнай» пилота суох авиационнай систиэмэлэр научнай-оҥорон таһаарар кииннэрин арыйыы былааннанар.
«Форум, үлэлээбит бастакы сылыттан, идея генератора эрэ буолбата. Манна дьиҥнээх быһаарыылар тэриллэн, бизнес уонна судаарыстыбаннай салайыы ону олоххо киллэрэллэр. Онон Сберга, биллэн турар, маннык уопсастыбаны кытта үлэлиир интэриэһинэй. Биһиги атын киһи уопутун ылан, бэйэбит киэнин үллэстэбит», — диэтэ «Сбербанк» ПАО Саха сиринээҕи салаатын управляющайа Олег Бугай.
Форум пленарнай мунньаҕа «Уһук Илин цифровай сайдыыта дойду приоритетын быһыытынан» диэн тиэмэҕэ ананыаҕа. Дьүүллэһии чэрчитинэн кыттааччылар Арассыыйа хотугулуу-илиҥҥи сайдыытыгар цифровизация сабыдыалын, ону тэҥэ сибээс уонна пилота суох авиация сайдыытыгар сыһыаннаах боппуруостары көрүөхтэрэ.
This post was published on 27.11.2025 17:17 17:17