Саха сирин киин улуустарыгар түүнүн кыһыҥҥы курдук тымныйар, ол эбэтэр -42 кыраадыска тиийэр. Онуоха арҕаа, соҕуруулуу-арҕаа улуустарга баара-суоҕа -10 эрэ буолуо. Бу нэдиэлэҕэ күн-дьыл туһунан ЯСИА-ҕа УГМС метеорологическай уонна агрометеорологическай сабаҕалааһыннарга отделын начаалынньыга Саргылана Никитина кэпсээтэ.
«Бу нэдиэлэҕэ киин улуустарга түүн-сарсыарда тымныы туманнаах күн-дьыл буолуоҕа. Чугастааҕы суукка Дьокуускайга күнүс кыра хаар күүтэбит, арҕааттан тыаллаах 2-5 м/с. Күнүс салгын температурата -28…-30 кыраадыска тиийиэҕэ. Чэппиэргэ, олунньу 12 күнүгэр, күнүс салгын температурата -30…-32 диэри түһүөҕэ. Бээтинсэҕэ үксүн сөҥүүтэ суох, туман, түүн -40…-42, күнүс -32…-34. Өрөбүллэр тымныы буолуохтара», — диэн ЯСИА Саргылана Никитина ырытыытыгар бэлиэтээтэ.
Сылас салгын чыпчаала бу нэдиэлэҕэ арҕаа циклон фронтальнай салаалара тахсалларын кытта сибээстээх.
«Чэппиэргэ арҕаа, соҕуруулуу-арҕаа улуустарга температура -10…-15 кыраадыска, Ленскэй оройуонугар -3…-8 кыраадыска тиийэрин күүтэбит. Өрөспүүбүлүкэ атын сиригэр сүрүннээн тымныы буолуо. Сааскы сылааһы билиҥҥитэ күүппэппит», — диэн Саргылана Никитина эбэн биэрдэ.
This post was published on 11.02.2026 08:01 08:01