28 Кулун тутар 28.03
  • -13°
  • $ 92,59
  • 100,27

Саха сиригэр үүтү соҕотуопкалааһыҥҥа үс миллиартан тахса солкуобайы ыытыахтара

Читайте нас на
Яндекс Новости
ЯДВ

Үүт туттарааччылар биир киилэ үүт иһин 60 солк. ылыахтара. Өрөспүүбүлүкэ тыа хаһаайыстыбатын министиэристибэтин аһылык бырамыысаланнаһын отделын салайааччыта Евгений Васильев иһитиннэрбитинэн, бу сыалга өрөспүүбүлүкэ бүддьүөтүттэн үс миллиартан тахса солкуобай көрүллүбүт.

«Тыа хаһаайыстыбатын министиэристибэтэ улуус дьаһалталарын кытары үүтү тутуу харчытын туһунан сөбүлэһиигэ илии баттастылар. Билигин муниципальнай тэриллиилэр субвенциянан өйөбүл ылыахтара. Бу субвенцияҕа олоҕуран оройуоннар куонкурустары ыыталлар уонна соҕотуопкалааччылары быһаараллар. Дуогабар кэннэ, кэлин үбү-харчыны аахсаллар. Үүтү туттарааччылары кытары салгыы соҕотуопкалааччылар бэйэлэрэ дуогабар түһэрсэллэр», — диэн схематын Евгений Васильев кэпсээтэ.

Саха сирин тыа хаһаайыстыбатын министиэристибэтин аһылыкка бырамыысаланнас отделын салайааччыта субвенция олохтоох бородууксуйаны оҥорон таһаарыыны көҕүлүүрүн уонна ас-үөл куттала суох буолуутун улаатыннарарын бэлиэтээтэ.

«Быйыл өрөспүүбүлүкэ үрдүнэн 3 миллиард 100 мөлүйүөн солкуобай үбү 62 тыһыынча туоннаҕа былааннаатылар. Өрөспүүбүлүкэ үрдүнэн биир киилэ үүт иһин 50 солк.  көмө харчы ааҕыллар. Соҕотуопкалааччылар өссө 10 солк. эбиэхтээхтэр, ол гынан баран өссө эбэр кыахтаахтар. Манна үүт сыаната оройуонуттан тутулуктаах буолар», — диэн эбэн эттэ.

Санатан эттэххэ, кулун тутар 31 күнүгэр өрөспүүбүлүкэ бырабыыталыстыбатын мунньаҕар регион бүддьүөтүттэн олохтоох салайыныы уорганнарыгар тыа хаһаайыстыбатын производствотын өйөөһүҥҥэ туспа судаарыстыбыннай боломуочуйалары биэрии уонна ороскуоттааһын бэрээдэгэр уларытыылары киллэрэр туһунан уураах ылыллыбыта. Үүтү туттарар хаһаайыстыбалар ахсааннарыгар кооператив пуондатыгар араарыллыбат тус хаһаайыстыбалаах тыа хаһаайыстыбатын кооперативтара кииристилэр.  Онон, бу кооперативтар үүтү субсидиялаах 60 солкуобайтан итэҕэһэ суох сыанаҕа туттарыахтарын сөп.

Следите за самым важным и интересным в Telegram-канале и WhatsApp-группе ЯСИА