Саха сиригэр төрүүр оҕолор аҥардарын кэриэтэ элбэх оҕолоох ыалларга төрүүллэр, кинилэр бүгүн 34,5 тыһыынчаттан тахса ахсааннаахтар (2020 сылга көрдөрүү 30 тыһыынчаҕа да тиийбэт этэ). Бу туһунан регион баһылыга Айсен Николаев «Саха» ГТРК «Быһаччы кэпсэтии» биэриитигэр быһа эфиргэ иһитиннэрдэ.
«Саха сиригэр, дойду үрдүнэн курдук, оҕо төрөөһүнэ кэнники сылларга улаханнык түспүтүн да иһин, син-биир инники күөҥҥэ тутуһар. Төрөөһүн коэффициенынан дойду бастакы 15 регионугар бигэтик киирэбит уонна Уһук Илиҥҥэ инники күөҥҥэ сылдьабыт. Ылыллыбыт [өйөбүл дьаһаллара] үчүгэй түмүккэ тиэрдэллэр», — диэтэ Саха сирин баһылыга.
Николаев РФ кабинета олунньуга Уһук Илиҥҥэ демографическай бэлиитикэтин 2030 сылга диэри стратегиятын бигэргэппитин санатта.
Саха сирин баһылыга өйөбүл региональнай дьаһалларын ортотугар «Дети столетия» диэн тус сыаллаах хапытаал үлэлиир болдьоҕун уһатыыны, ону тэҥэ «Дьиэ кэргэн» ийэ хапытаалын төрдүс уонна онтон кэнники оҕоҕо кэҥэтиини бэлиэтээтэ.
Ону таһынан былырыыҥҥыттан элбэх оҕолоох ыаллары кэккэ хайысхаларынан өйөөһүн, дохуотуттан тутулуга суох, бэриллэр. Ити уопсастыбаннай транспорга айан, оскуолаларга босхо аһааһын уонна хомунаалынай өҥөҕө 30% чэпчэтии.
Саха сирин баһылыга эппитин курдук, федеральнай өйөбүл дьаһалларын кытта тэҥҥэ тутуллан, бу быһаарыылар чугастааҕы сылларга демография сайдыытыгар үтүө түмүгү биэриэхтээхтэр. Онуоха Айсен Николаев саҥа дьаһаллар наадаларын бэлиэтээтэ.
«Дойду таһымыгар демография кыһалҕатыгар, ордук Уһук Илиҥҥэ, улахан болҕомто ууруллар. Оннук салҕанан барыа диэн эрэнэбин», — диэн өрөспүүбүлүкэ баһылыга түмүктээтэ.
This post was published on 19.02.2026 12:08 12:08