2026 сыл саҕаланыаҕыттан Россия Социальнай пуондатын Саха сиринээҕи салаата 17 сааһыгар диэри саастаах 18 499 оҕо төрөппүтүгэр биир кэлим босуобуйа анаан төлөөтө. Ону таһынан төлөбүрү 449 хат дьахтар оҥордулар. Ол туһунан олунньу 24 күнүгэр брифиҥҥэ СФР регионнааҕы отделениетын управляющайа Марина Герман иһитиннэрдэ.
Кини этэринэн, 2026 сыл кулун тутар 1 күнүттэн босуобуйаҕа быраабы ааҕыыга алименнары учуоттааһын бэрээдэгэр уларытыылар олоххо киирэллэр.
«Өскөтүн сайабылыанньалаах алимент төлөбүрүн туһунан суут уурааҕын эбэтэр суут бирикээһин биэрбэтэҕинэ, биир кэлим босуобуйаҕа быраабы быһаарыыга алимент бигэргэтиллибит кээмэйинэн учуоттаныа: биир оҕоҕо — региоҥҥа орто ыйдааҕы номинальнай хамнас чиэппэрэ, икки оҕоҕо — үс, онтон ордук — аҥара. Алимены суут туруорбут буоллаҕына, урукку курдук, дьиэ кэргэн дохуотугар сайабылыанньаҕа ыйыллыбыт дьиҥнээхтик ааҕыллыбыт суума эрэ ааҕыллар», — диэн Марина Герман быһаарда.
Региоҥҥа ыйдааҕы орто номинальнай ааҕыллыбыт хамнаһы Росстат официальнай саайтыгар чуолкайдыахха сөп.
Итини сэргэ 2026 сылтан үлэлиир кыахтаах дьиэ кэргэн чилиэнин сыллааҕы минимальнай дохуотугар ирдэбил уларыйда. Урут түөрт МРОТ-тан итэҕэһэ суох буолуохтаах эбит буоллаҕына, билигин аҕыс МРОТ-тан итэҕэһэ суох. Харчынан этиигэ ити сылга 216 744 солк.тэҥнэһэр.
Чэчэтиилэр көрүллэллэр. Дохуот суох буолуутун убаастабыллаах биричиинэлэринэн, чуолаан, 23 сааһыгар диэри саастаах уонна истэн үөрэнэр буоллаҕына, хат буолуу эбэтэр официальнай үлэтэ суох буолуу ааҕыллаллар.
«Төрөппүт үлэлээбэтэҕинэ, холобур, үс ый үлэлээбэтэҕинэ, бу кэм босуобуйа аныырга наадалаах минимальнай дохуоту пропорциональнайдык кыччатыаҕа. Ааҕыыга дохуот 12 ыйга буолбакка, 9 ыйга ылыллыаҕа. Гражданин дьарыктаах буолуу киинигэр учуокка турар кэмигэр, чуолаан, официальнай үлэтэ суох буолуу учуоттанара наадалаах», — диэн СӨ отделениетын управляющайа чуолкайдаата.
Санатар буоллахха, биир кэлим босуобуйа нэһилиэнньэҕэ ортотунан дохуот алын кээмэйиттэн аллараа сытар ыалларга бэриллэр.
This post was published on 24.02.2026 17:09 17:09