Саха сиригэр анал байыаннай дьайыы бэтэрээннэрэ «Эр хоһуун» бырайыак чэрчитинэн физическэй култууранан уонна спордунан тиһиктээхтик дьарыктаныыга кытталлар. Бырайыак 2024 сыллаахтан «Защитники Отечества» пуонданы кытта олоххо киллэриллэр, диэн Саха сирин спордун министиэристибэтиттэн иһитиннэрдилэр.
СВО кыттыылаахтарын физическэй уонна социальнай реабилитациялара регионнааҕы адаптивнай физическэй культура уонна спорт киинин баазатыгар алта спорт көрүҥэр барар: ох саанан ытыыга, пауэрлифтиҥҥэ, остуол тенниһигэр, буулдьанан ытыыга, армрестлинг уонна олорон волейболга. Манна кинилэри адаптивнай спорт кыаҕын билиһиннэрэллэр, исписэлиистэр уонна тренердэр консультация ыыталлар.
Бырайыак үлэҕэ киириэҕиттэн икки бөдөҥ регионнааҕы физкультурнай тэрээһин ыытылынна — Аҕа дойдуну көмүскээччилэр Кубоктара уонна Аҕа Дойду Дьоруойдарын Күнүгэр анаммыт өрөспүүбүлүкэтээҕи физкультура тэрээһинэ. Кыттааччылар уопсай ахсааннара 200-тэн тахса буолла. 18 хамаанданы 17 улуус уонна Дьокуускай куорат кытыннардылар.
Маны таһынан бойобуой дьайыылар бэтэрээннэрин күнүгэр «ГТО для СВОих» акция чэрчитинэн ГТО нуорматын толоруу буолла.
Өрөспүүбүлүкэ бары спортивнай эбийиэктэригэр СВО кыттыылаахтарыгар физическэй культуранан уонна спордунан босхо дьарыктанар кыах бэриллэр. Кинилэр дьиэ кэргэттэрин чилиэннэригэр эрчиллиигэ сылдьарга чэпчэтии көрүллэр. Байыаннай сулууспалаахтар оҕолоро инникилээн спортивнай тэрилтэлэргэ киирэллэр уонна босхо таҥаһынан хааччыйаллар.
«Физическэй культура уонна спорт бойобуой дьайыылар бэтэрээннэрин уонна СВО кыттыылаахтарын реабилитациялааһыҥҥа уонна социальнай адаптациялааһыҥҥа сүҥкэн оруоллаах. Куруук эрчиллии, күрэхтэһиигэ кыттыы уонна хамаанданан спорт көрүҥнэрэ эт- хаан доруобуйатын бөҕөргөтөр эрэ буолбакка, психологическай мэһэйдэри туоруурга, бэйэ кыаҕар эрэллээх буолууну чөлүгэр түһэрэргэ уонна биир санаалаах дьон саҥа түмсүүлэрин буларга көмөлөһөллөр», — диэн өрөспүүбүлүкэ физическэй культураҕа уонна спортка миниистирин бастакы солбуйааччы Гаврил Мохначевскай тоһоҕолоон бэлиэтээтэ.
Спорт министиэристибэтиттэн иһитиннэрбиттэринэн, «Эр хоһуун» бырайыак олоххо киириитэ салҕанан, региоҥҥа СВО бэтэрээннэригэр уонна кыттыылаахтарыгар физкультура уонна спорт дьарыктаналларыгар кыаҕы кэҥэтиигэ туһуланар.
Саха сирин баһылыга Айсен Николаев Ил Түмэҥҥэ туһаайыытыгар СВО бэтэрээннэрин социальнай реабилитация уонна эйэлээх олоххо адаптациялааһын боппуруостара ураты болҕомтону ирдииллэрин тоһоҕолоон бэлиэтээтэ, бу кинилэри үөрэтии уонна үлэҕэ киллэрии, уопсастыбаннай олоххо кытыннарыы.
Тэрээһин дойду президенэ Владимир Путин көҕүлээбит «Спорт России» федеральнай судаарыстыбаннай бырагыраама сыалын-соругун толорууга туһуланна.
This post was published on 27.01.2026 16:03 16:03