Саха сиригэр ааспыт сууккаҕа уопсайа 8374 гектар иэннээх сиргэ 20 ойуур баһаарын умуллардылар, аны 55 га иэннээх икки саҥа уот булулунна. От ыйын 13 күнүгэр сарсыарда 46 тыһыынчаттан тахса гектар иэннээх сиргэ 42 баһаар умайа турар, диэн өрөспүүбүлүкэ бастакы зампреда Дмитрий Садовников СИА-ҕа иһитиннэрдэ.
«Бүгүн 8661 гектар иэннээх сиргэ 10 баһаары умуллара сылдьаллар, олортон 1235 гектар иэннээх сиргэ икки баһаары туораттылар. Миэстэлэргэ 610 киһи уонна 23 тиэхиникэ үлэлии сылдьаллар. Ол иһигэр дьону таһарга уонна тыаны кэтээн көрөргө сөмөлүөттэр уонна бөртөлүөттэр үлэлииллэр», — диэн Дмитрий Садовников иһитиннэрдэ.
Саха сиригэр баһаар сезона саҕаланыаҕыттан 160 тыһыынчаттан тахса гектар иэннээх 333 ойуур баһаарабэлиэтэммит. Ааспыт сыл баччаларга 1,5 мөл. гектар иэннээх сиргэ 1039 баһаар бэлиэтэммитэ.
Бэҕэһээ Саха сирин баһылыга Айсен Николаев Уус-Майа уонна Алдан оройуоннарын сирдэригэр ойуур баһаардарын суһал быһыытын-майгытын туһунан мунньах ыыппыта, бу эҥэр саамай элбэх баһаардар буола тураллар. Мунньахха кураан күн-дьыл суоһуурун учуоттаан, ойуур баһаарын умуруорууга эбии күүһү уурар туһунан боппуруостары көрдүлэр.
