Дьокуускайга суһал медицинскэй көмө сулууспатын 95 сылыгар анаммыт профессиональнай маастарыстыба республикатааҕы конкурса ыытылынна. Кыайыылааҕа, икки призера, ону тэҥэ анал бириистэр хаһаайыннара быһаарылыннылар. Бу туһунан Саха сирин доруобуйа харыстабылын министерствотын пресс-сулууспатыгар иһитиннэрдилэр.
Куонкуруска барыта тоҕус хамаанда кытынна. Визитнай карточкалары көрдөрдүлэр, теоретическай тест суруйдулар уонна практическай толордулар. Судьуйалар суһал көмөнү оҥорууга медиктэр бииргэ үлэлииллэрин сыаналаатылар.
Ол түмүгэр Дьокуускайдааҕы суһал медицинскэй көмө станциятын хамаандата — Мария Терешкина уонна Семен Михаилов бастыҥнарынан билиниллибиттэр. Иккис миэстэни Мэҥэ Хаҥалас киин балыыһатын бэрэстэбиитэллэрэ — Евдокия Владимирова уонна Анна Васильева ыллылар. Үһүскэ – Уус Алдан киин балыыһатыттан Айсен Харбаев уонна Арчын Егоров. «Айар сыһыан» номинацияны Нам киин балыыһатын биригээдэтэ — Алексей Неустроев уонна Люция Саввинова ыллылар. Сүрэх-тыҥа реанимация түһүмэҕэр бастыҥ көрдөрүүнү Өлүөхүмэ киин балыыһатын үлэһиттэрэ Александр Корощупов уонна Баатр Санджиев көрдөрдүлэр.
«Кыайыыга дьулуур» номинацияҕа Хаҥалас балыыһатын хамаандатын Алена Тарасованы уонна Герасимовы наҕараадалаатылар.
Куонкуруһу тэрийээччилэринэн Доруобуйа Харыстабылын Министиэристибэтэ, Саха сирин суһал медицинскэй көмөтүн станцията, М.К. Аммосов аатынан Хотугулуу-Илиҥҥи федеральнай университет Медицинскэй института уонна орто медицинскэй үлэһиттэр республикатааҕы Ассоциациялара буоллулар.
