Саха сирин киин куоратыгар «Тооку доҕотторун ыҥырар. Союзмультфильм Саха сиригэр» муус скульптураларын күрэҕэ түмүктэннэ. Тэрээһини дойду номоххо киирбит киинэ устуудьуйата 90 сылыгар анаатылар. Муус быыстапкатын былаһааккатынан Сайсары күөлүгэр саҥа «Сайдар-Парк» буолла, диэн өрөспүүбүлүкэ сайдыытын Корпорацията иһитиннэрэр.
200 тыһыынча солкуобайдаах сүрүн бирииһи «Макита» хамаандата ылла. Маастардар Аркадий Сивцев уонна Мэҥэ Хаҥалас улууһуттан Роман Петухов «Чемпионнар» ойуулук сиэринэн композицияны билиһиннэрдилэр, дьүүллүүр сүбэ толоруу техникатын уонна уобарастарга бэриниини үрдүктүк сыаналаата.
Иккис миэстэ уонна 150 тыһыынча солкуобайдаах бириис «Кыһыл Көмүс кынаттар» кэлэктиипкэ «Оранжевай ынах» ойуулук муус интерпретациятын иһин тигистэ.
Үс лидерынан «Боотурдар» хамаанда «Простоквашиноҕа кыһыҥҥы киэһэлэр» композиция ааптардара буолан, 100 тыһыынча солкуобайы ыллылар. Атын кыттааччылар эмиэ болҕомтолоро суох хаалбатылар, 40-нуу тыһыынча солкуобайы туттулар.
Бырайыагы тэрийээччилэринэн «Союзмультфильм» киинэ устуудьуйата, «Орион» хампаанньа, «Саха» НКИХ уонна Сайдыы республикатааҕы корпорацията буоллулар.
«Маннык куонкуруһу ыытыы биһиги маастардарбыт сайдыыларыгар улахан суолталаах хардыы. Маннык бырайыактар нөҥүө Саха сирэ дойду креативнай экэниэмикэтин кииннэриттэн биирдэстэрэ буолар статуһун бигэргэтэр», – диэн Саха сирин сайдыытын корпорациятын креативнай индустрияларын сайыннарыыга дириэктэрэ Петр Гоголев бэлиэтээтэ.
Маастардар олунньу 3-7 күннэригэр креативноска уонна уобарастары ымпыктаан-чымпыктаан оҥорууга үлэлээтилэр. Дьокуускай олохтоохторо уонна ыалдьыттара «Союзмультфильм» геройдарын олунньу 14 күнүгэр паарка официальнай аһыллыытын кэнниттэн көрүөхтэрин сөп.
