Дьокуускай куоракка атырдьах ыйын 28-30 күннэригэр СӨ Үлэ уонна социальнай сайдыы министиэристибэтин тэрилтэлэрин эдэр ыччатын бастакы сүлүөтэ буолар. Бу туһунан НВК Саха суруйар.
Тэрээһин «Виктория» лааҕырга ыытыллар. Өрөспүүбүлүкэ араас сириттэн 76 социальнай эйгэ үлэһитэ кыттыыны ылар.
Кыттыылаахтар бастакы күҥҥэ хамаанданан арахсан, «взгляд молодых» диэн корпоративнай бырайыактары оҥороллор. Маны таһынан тэрийээччилэр хамаанданан оонньуулары, социальнай эйгэ биллиилээх дьонун кытта көрсүһүүлэри уонна доҕордоһуу киэһэтин тэрийэллэр.
Иккис күҥҥэ исписэлиистэр иһитиннэрэр-үөрэтэр былаһааккаҕа үлэлиэхтэрэ. Маастар-кылаастарга кытталлар уонна СӨ Үлэ уонна социальнай сайдыы миниистирин Елена Волкованы кытта көрсүөхтэрэ. «Мой выбор – социальная работа» видеоролик күрэҕин түмүгэ тахсыаҕа итиэннэ кэнсиэр күүтүллэр.
Атырдьах ыйын 30 күнүгэр, сүлүөт бүтэһик күнүгэр эдэр үлэһиттэр СӨ Үлэ уонна социальнай сайдыы министиэристибэтэ салайар тэрилтэлэрин үлэтин кытта билсиэхтэрэ.
This post was published on 28.08.2024 16:45 16:45