Үөрэх үлэһиттэрин атырдьах ыйынааҕы сүбэ мунньахтарын пленарнай мунньаҕар Айсен Николаев «Ситим учуутала» диэн саҥа пилотнай бырайыагы биллэрдэ. Дьаһал 7-9 кылаас үөрэнээччилэригэр физикаҕа, химияҕа уонна биологияҕа квалификациялаах педагогтар тиийбэттэрин быһаарарга туһуланар. Бу туһунан регион салалтатын пресс-сулууспата иһитиннэрэр.
Өрөспүүбүлүкэ баһылыга үөрэх тиһигин сайыннарыы сүрүн хайысхатынан аныгы цифровой технологиялары уонна үөрэтии ситим киэптэрин туһаныыны ааттаата.
«Бырайыак чэрчитинэн онлайн-уруоктар тэриллиэхтэрэ, үөрэх контена, ол иһигэр электроннай учебниктар, видеоматырыйааллар уонна аудиоуруоктар бэриллиэхтэрэ. Үөрэх уонна наука министиэристибэтэ инновация министиэристибэтин кытта кэлэр сылга кыра кыамталаах оскуолалары бырайыагынан муҥутуур хабыыга көһөр туһугар усулуобуйаны хааччыйыахтаах», — диэтэ Айсен Николаев бэйэтин этиитигэр.
Кини өрөспүүбүлүкэ үөрэҕин эйгэтин цифровой ситимэ үрдүгүн бэлиэтээтэ, ити дистанционнай технологиялары сайыннарарга кыаҕы биэрэр. Бүгүҥҥү күҥҥэ Саха сирин бары уопсай үөрэхтээһин уонна профессиональнай үөрэх кыһалара интернеккэ босхо киирэллэр.
Кэнники биэс сылга «Үөрэхтээһин» национальнай бырайыак чэрчитинэн оскуолаларга 11 тыһыынчаттан тахса цифровой оборудование тиэрдилиннэ. Иккис сылын Үөрэх киинэ үлэлиир, онно 40 педагог-наставник 1400 выпускнигы тэйиччиттэн үөрэппит.
«Ити бастакы түмүктэри аҕалла: 2023 сылга тэҥнээтэххэ физикаҕа уонна профильнай математикаҕа БКЭ орто бааллара 10, химияҕа 5 үрдээтилэр. Бу предметтэргэ намыһах кирбиини туораабыт үөрэнээччилэр элбээтилэр», – диэн регион баһылыга бэлиэтээтэ.
Айсен Николаев уопуттаах педагогтары көҕүлээн Үөрэх киинин кэҥэтии наадатын ыйда.
“Миэстэлэринэн чопчу предметтэри үөрэтэр учууталлар тиийбэттэрин кыһалҕатын туоратар уонна үөрэх хаачыстыбатын үрдэтэр туһугар үөрэнээччилэри, ордук ыраах оройуоннартан, кыра комплектаах оскуолалартан, хабыыны улаатыннарыахха наада», — диэн Саха сирин баһылыга тоһоҕолоон бэлиэтээтэ.
