Туймаада агрохолдинг сибиинньэ иитэр комплекс кыамтатын улаатыннарыаҕа. Өрөспүүбүлүкэ нэһилиэнньэтин олохтоох бородууксуйанан хааччыйар туһугар саҥа аныгы сыахтар тэриллиэхтэрэ. Ол туһунан Саха сирин бырабыыталыстыбатын бэрэссэдээтэлэ Андрей Тарасенко ООО «Хатасский свинокомплекс» сылдьан баран иһитиннэрбитин, СИА-ҕа регион баһылыгын уонна бырабыыталыстыбатын пресс-сулууспата иһитиннэрэр.
«Арҕааҥы дойдулар биллэрбит санкцияларын усулуобуйатыгар экономиканы үлэлэтии чэрчитинэн, ас-үөл өттүгэр нэһилиэнньэ туохтан даҕаны куттаныа суохтаах. Манна бүтүн Арассыыйа үрдүнэн, тыа хаһаайыстыбатын тэрилтэлэриттэн олус элбэх боппуруос тутулуктаах», — диэтэ Саха сирин баһылыга Айсен Николаев этэн турардаах.
Хатас сибиинньэ иитэр комплекса икки производственнай сыахтаах – репродуктивнай уонна аһатар. Сыллата бу сыахха 12 тыһыынча сибиинньэттэн 520-530 туонна сибиинньэ этэ соҕотуопкаланар. 2022 сылга — былаан 522 туонна.
Тыа хаһаайыстыбатын миниистирэ Александр Атласов бэлиэтээбитинэн, сибиинньэ иитэр комплекс отуттан тахса сыл анараа өттүгэр үлэтин саҕалаабыта ол иһин материальнай-техническэй базата саҥардыллыан наада. Производствоны кэҥэтэргэ сир тиийбэт, комплекс икки өттүнэн дьоҕус үрэхтэр ааһаллар. Аныгы ирдэбилинэн сибиинньэ иитэр циклга хас биирдии отделга туспа дьиэ көрүллүөхтээх. Билигин сыахтар бары биир дьиэҕэ бааллар.
Андрей Тарасенко тыа хаһаайыстыбатын министиэристибэтигэр «Туймаада» АО-ны кытта Мэҥэ-Хаҥалас оройуонун сиригэр-уотугар 5 тыһыынча төбө кыамталаах сибиинньэ иитэр комплекс бырайыагын эбии олохсутарга сорудахтаата.
