2026 сыл кулун тутар 1 күнүттэн Саха сиригэр «Акселератор «Сельский поставщик 2.0» бырайыагы олоххо киллэрии саҕаланна. Кыттааччы 18 сааһыттан ким баҕалаах буолуон сөп, ол иһигэр бэйэтэ үлэлээх, урбаанньыттар уонна өрөспүүбүлүкэ тыа сиригэр регистрацияламмыт юридическай сирэйдэр.
Бырайыак олохтоох бородууксуйаны таһаарааччылары РФ хантараагын систиэмэтин кытта үлэҕэ киллэрэн, регионҥа дьэҥкир күөн күрэстэһэр эйгэни тэрийиигэ, ону тэҥэ судаарыстыбаннай сокуупкаҕа кыттыһан, кинилэр билиилэрин таһымын уонна күрэстэһиилэрин үрдэтиигэ туһуланар.
Акселератор чэрчитинэн 200-тэн итэҕэһэ суох истээччини босхо үөрэтии былааннанар. Онлайн-киэбинэн кыттааччылар бизнес ыытарга уонна айымньылаах кыаҕы коммерциализациялыырга ирдэнэр үөрүйэхтэри баһылыахтара: судаарыстыбаннай сокуупкаҕа кыттыы, интеллектуальнай быраабы көмүскээһини оҥоруу, үп-харчы учуотун ыытыы.
Грант үбэ үөрэх платформатыгар үөрэтэр видеоуроктары оҥорууга ыытыллыаҕа. Куурус үс модуллаах: «Госзакупкаҕа кыттыы», «Интеллектуальные права как инструмент для закупки и увеличение активов», «Финансовые инструменты в бизнесе».
Бырайыак «”Проф-Юнит” Центр исследования и повышения компетенция» АНО ДПО ыытар, Ил Дархан гранын суотугар, гражданскай уопсастыба сайдыытыгар анаммыт хайысхаҕа. Билигин тэрийээччилэр видеоуроктары суруйууга киирэн тэрийэр боппуруостары быһаарсаллар.
Кууруска киирии 2026 сыл ыам ыйын 1 күнүттэн GetCourse үөрэх платформатыгар арыллыаҕа. Суруттарыы prof-unit.ru сайтка ыытылла турар.
Кыттыы уонна бииргэ үлэлээһин боппуруостарыгар: 25-98-25 төлөпүөҥҥэ эрийиэххэ сөп.
This post was published on 04.03.2026 13:03 13:03