«Салгынынан туоратыы» пилота суох тириэрдии бырайыагын маршруттарын ахсаанын Саха сиригэр эһиил 20-ҕэ тиэрдии былааннанар. Бу туһунан регион бырабыыталыстыбатын бэрэссэдээтэлин солбуйааччы Анатолий Семенов эттэ, диэн ТАСС иһитиннэрэр.
Билигин бастакы рейстэр үлэҕэ киирдилэр, баһыылканы ыытыы сыаната 200 солк. Бырайыак билиҥҥитэ ночооттоох эрээри, күһүөрү диэри өссө 6 хайысха үлэҕэ киирэрэ былааннанар. Маршруттары сөбүлэһиннэрии уонна кыра «дронопорттары» тутуу ыытыллар.
Дьокуускай уонна Аллараа Бэстээх бөһүөлэгин икки ардыларыгар пилотнай тиэйии от ыйыгар үлэтин саҕалаата. Дроннар 15 мүнүүтэҕэ 10 киилэҕэ тиийэ таһаҕаһы таһаллар. Сакаастар олохтоох маркетплейс нөҥүө ылыллаллар. Бастакы ыйга 192 рейс толорулунна, 143,5 кг таһаҕас тиэрдилиннэ.
Бырайыак «Саха Сирэ» технопарк уонна инновациялары сайыннарыы регионнааҕы пуонда өйөбүлүнэн саха хампаанньаларынан олоххо киирдэ.
This post was published on 18.08.2025 10:06 10:06