Кэлэр үс сылга Саха сиригэр «Мухтуйа» регионнааҕы суолу 90-ча км өрөмүөннүөхтэрэ. 2028 сылга суол уһунун 85%-ныттан итэҕэһэ суоҕу нуорма туругар киллэриэхтэрэ. Бу туһунан регион тырааныспарын уонна суол хаһаайыстыбатын миниистирэ Владимир Сивцев иһитиннэрдэ.
«Бүгүн Ленскэй уонна Мииринэй оройуоннарын сиригэр-уотугар үлэлиир сир баайын туһанааччылары кытта, бу суолу тутууга кыттыыларын чааһыгар, хааччыйыыга уонна туһаныыга үлэ барарын бэлиэтиэххэ наада. Ону таһынан суолу федеральнай бас билиигэ ылынар федеральнай киини кытта үлэни салҕыыбыт», — диэн кэпсээтэ Владимир Сивцев.
Маны сэргэ массыына суолун харыстабылын хааччыйыыга ыйааһыны хонтуруоллуур автоматическай пууну (АПВГК) туруоруу былааннанар.
Маны таһынан, миниистир этэринэн, Иркутскай уобалаһы уонна Бурятияны кытта бииргэ Таас — Үрэх — Верхнемарково кыһыҥҥы суолтан тэйэр сыаллаах Таксимо — Кропоткин — Ленскэй — Мииринэй регионнар икки ардыларынааҕы сылы эргиччи суол тутуутун бырайыага оҥоһуллар.
«Маннык бырайыак аны кэлэр сылтан Иркутскай уобалаһын территориятыттан саҕаланыаҕа. Оттон биһиги бэйэбит өттүбүтүттэн Иркутскай уобалаһын кыраныыссатыгар диэри саҥа суол трассировкатын үөрэтэбит», — диэн бэлиэтээтэ Сивцев.
Санатан эттэххэ, эрдэ Саха сирин баһылыга Айсен Николаев «Мухтуйа» суол туругун хонтуруоллааһыны хааччыйарга уонна 2028 сылга өрөмүөннээһини түмүктүүргэ сорудахтаабыта.
This post was published on 18.09.2025 15:01 15:01