РФ спордун миниистирэ Павел Колобков ахсынньы 5 күнүгэр Дьокуускайга дьыалабыай сырыыта саҕаланна. Кини Ил Дархан Айсен Николаевы кытта көрсүө, Чурапчытааҕы физкультура уонна спорт институтугар сылдьыа, регион спортивнай инфраструктуратын кытта билсиэ.
Павел Колобкову Дьокуускай пуордугар регион бырабыыталыстыбатын бэрэссэдээтэлин солбуйааччыта Ольга Балабкина, Саха сирин баһылыгын уонна бырабыыталыстыбатын дьаһалтатын салайааччыта Афанасий Владимиров, спорт миниистирэ Иннокентий Григорьев көрүстүлэр.
«Саха сиригэр Россия спордун миниистирэ, Олимпийскай оонньуулар кыайыылаахтара, фехтованиеҕа алта төгүллээх аан дойду чемпиона Павел Колобков кэллэ. Кини «Спорт — норма жизни» национальнай бырайыак Саха сиригэр хайдах үлэлиирин билсэр сыаллаах. Итиэннэ тутулла турар спортивнай эбийиэктэри көрүө. Чурапчытааҕы институкка сылдьыа, онно билигин федеральнайдааҕы бырагырааманан тутуллар 200 миэстэлээх остолобуойдаах уопсай дьиэ үлэтин билсиэ. Маны сэргэ Саха сирэ уонна РФ спордун министиэристибэтэ бииргэ үлэлээһиннэригэр сөбүлэҥҥэ Айсен Николаев уонна Павел Колобков көрсүһүөхтэрэ», — диэн СИА-ҕа Иннокентий Григорьев кэпсээтэ.
Дьокуускайга Павел Колобков «Дохсун», «Модун», «Триумф» спортивнай комплекстарга сылдьыа, көрсүһүүлэр буолуохтара.
This post was published on 05.12.2019 09:55 09:55