Саха сиригэр Россия Геройа Дмитрий Куценконы чиэстээтилэр

Дмитрий Куценко үрдүк бочуоттаах бэлиэни — Россия Геройа сулуһун — ааспыт сыл алтынньытыгар ылбыта, наҕарааданы РФ оборуонаҕа миниистирэ Андрей Белоусов туттарбыта. Кини батальона 810-с севастопольскай биригээдэ састаабыгар киирэн Мариуполи босхолооһуҥҥа кыттыбыта, оборуонаны сатабыллаахтык тэрийбитэ, утарылаһааччы күүс кимэн киириитин тохтоппута. Бу хорсун быһыытын иһин Куценко биригээдэтигэр бастыҥ ааты ылбыта.

«Охсуһуу толоонугар Ийэ дойдуну геройдуу көмүскээбиккэр махтанабыт. Төрөөбүт Өлүөхүмэҥ сирэ уонна Сахаҥ сирэ байыаннай киирсиилэр кэмнэригэр куруук эйиэхэ күүс-уох, тулхадыйбат быһаарыныы, күүстээх эппиэтинэс биэрбиттэригэр эрэллээхпин. Дойдугар уоппускаҥ кэмигэр кэлбиккэр үөрэбит. 1941-с сылларга саха буойуттара Аҕа дойду көмүскэлигэр туруммуттарын курдук, эн анал байыаннай дьайыы саҕаланыаҕыттан дойдуну көмүскээһиҥҥэ кыттаҕын. Хорсун быһыыгынан Россия историятыгар ааккын суруйдуҥ», — диэтэ Айсен Николаев.

Церемония кэмигэр Россия Геройдара Дмитрий Куценкоҕа уонна Александр Колесовка кинилэр ааттара суруллубут саха алмааһын репликаларын уонна пааспардарын туттардылар.

Дмитрий Куценко билигин уоппускаҕа сылдьар, анал байыаннай дьайыыга кыттар байыастарга көмөлөрүн иһин махтанна. «Бэҕэһээ Өлүөхүмэттэн кэллим. Онно баһылыгы, учууталлары, бииргэ үөрэммит оҕолорбун кытта көрүстүм. Оскуолабар сырыттым — олус сылаастык көрүстүлэр. Бэйэм Новосибирскайга төрөөбүтүм, ити эрээри Саха сирин уонна Өлүөхүмэни бэйэм дьиэбинэн ааҕабын. Хантан сылдьаҕын диэн ыйыттахтарына — Саха сириттэн диибин», — диэтэ Россия Геройа.

Церемонияҕа чугас дьоно уонна аймахтара бааллар. Герой ийэтэ Татьяна Куценко бэлиэтээбитинэн, Дмитрий бырааттарын кытта үлэһит буола улааппыттар, байыаннай-патриотическай киинэлэри көрөллөрө уонна сулууспалыылларын баҕараллара.

«Дима оҕо сылдьан геройдар курдук буолуохха сөп дуо диэн ыйытааччы. Сөп, чиэһинэй уонна хорсун буоллаххына диэччибин. Анал байыаннай дьайыы саҕаламмытыгар, Донбаһы өйүүбүт диэн киэн туттарым, онтон оҕом онно баарын санаабытым. Ыарахан кэмнэр этэ. Оннук олоххо үөрэниэххэ наада курдуга. Киэн туттабын уолум саспакка, Ийэ дойду көмүскэлигэр сүрэҕин баҕатынан барбытыгар», — диэтэ Татьяна Куценко.