Өрөспүүбүлүкэҕэ атырдьах ыйын 13 күнүттэн РФ судаарыстыбаннай былааҕын күнүгэр анаан бибилэтикэлэргэ кинигэ быыстапкалара, уруоктар, викториналар, аахсыйалар ыытыллаллар, НВК Саха суруйар.
Атырдьах ыйын 16 күнүттэн СӨ национальнай художественнай түмэлигэр, академик Афанасий Осипов хартыынатын галереятыгар уонна М.Ф. Габышев аатынан тас дойду искусстватын галереятыгар араас айар-тутар тэрээһиннэр буолаллар.
Атырдьах ыйын 21 күнүттэн 26 күнүгэр диэри Хаҥалас улууһугар оҕунан ытыыга өрөспүүбүлүкэтээҕи чемпионат ыытыллар.
Волонтердар Орджоникидзе, Хомсомуол, Ленин болуоссаттарыгар уонна Центральнай скверыгар Арассыыйа былааҕын өҥнөөх лиэнтэлэри түҥэтэллэр.
Атырдьах ыйын 22 күнүгэр «Российский триколор» аахсыйанан Чочур Мырааҥҥа Арассыыйа судаарыстыбаннай былааҕын таһаарыахтара.
Атырдьах ыйын 22 күнүттэн Арассыыйаҕа Дьиэ кэргэн, Саха сиригэр Оҕо саас сылларын чэрчитинэн, бастакы өрөспүүбүлүкэтээҕи дьиэ кэргэн уонна патриотическай бэстибээлэ саҕаланар.
«Россия — мин историям» историческай пааркаҕа «Аҕа дойдуну көмүскээччилэр» пуонда филиалын быыстапката арыллар. Маны тэҥэ «Символы России» документальнай киинэ көстөр уонна «Мин былааҕым – Россия Федерациятын былааҕа» маастар-кылаас ыытыллар.
Дьокуускай куорат олохтоохторун Хомсомуол болуоссатыгар массыына сүүрдүүтэ күүтэр.
Култуура уонна сынньалаҥ пааркатыгар «Мы — будущее России!» аниматордара спортивнай-оонньуу бырагырааматын ыыталлар.
Орджоникидзе болуоссатыгар улахан тэрээһин ыытыллар. Ол курдук, араас кэнсиэр, дьаарбаҥка, маастар-кылаас, аахсыйа тэриллэр. Онтон Кыайыы болуоссатыгар үҥкүү флешмоба буолар.
Курскай уобалас олохтоохторугар анаан гуманитарнай көмөнү хомуйуу аахсыйа А.Е. Кулаковскай аатынан Норуоттар доҕордоһууларын дьиэтигэр ыытыллар.
This post was published on 21.08.2024 17:50 17:50