Саха сирин былааһын уоргана 1,8 млрд солкуобайы үрдүк технологиялаах медицинэни сайыннарыыга ыытар соруктаах. Маныаха анаммыт тустаах уураахха өрөспүүбүлүкэ баһылыга Егор Борисов илии баттыаҕа. Саха сирин доруобуйа харыстабылыгар министиэристибэтэ кэлэр түөрт сылга медицинэ кииннэрин саҥа оборудованиенан ситэриэҕэ, эмтээһин иннвационнай ньымаларын туттуоҕа, трансплантологияны уонна роботизированнай медицинэни сайыннарыаҕа.
Егор Борисов, доруобуйа харыстабылын систиэмэтэ төрдүттэн уларыйыахтааҕын чиҥэтэн этэр. Онон, 2030 сылга диэри больохтоох сайдыы концепциятын кини көҕүлүүр.
«Бу докумуон ылыллыыта олохсуйбут нэс балаһыанньаны уларытыаҕа, доруобуйа харыстабылыгар букатын атын саҥа стратегияны олохтуоҕа», — диэтэ кини.
Доруобуйа харыстыбалын миниистирэ Михаил Охлопков этэринэн, балысхан уларыйыылар түөрт түһүмэҕинэн ыытыллыахтара. 2016-2017 сылларга үрдүк технологиялаах медицинскэй көмөнү оҥорор саҥа структуралар баар буолуохтара. 2017-2019 сылларга инновационнай эмтээһини киллэрии саҕаланыаҕа. Маныаха киһи ис уорганнарын уонна силиини трансплантациялааһын киирэ сылдьар. Ону таһынан роботизированнай хирургияны сайыыннарыы 2018-2019 сылларга былааннанар. Үрдүк технологиялаах медицинскэй көмө дьоҥҥо кыаллымтыа буолуоҕа.
Бырайыагы олоххо киллэриигэ 1,8 млрд солк. кээмэйдээх үп-харчы өрөспүүбүлүкэтээҕи уонна федеральнай бюджеттартан түһүмэҕинэн бэриллиэҕэ.
Национальнай медицинэ киинигэр, 2-с №-дээх өрөспүүбүлүкэтээҕи, Дьокуускайдааҕы офтальмологическай балыыһаларга уонна онкологическай диспансерга концепция киллэриллэр. Түөрт сыл устатыгар медицинскэй аныгы тиэхиньикэнэн хааччыйыы оҥоһуллуоҕа.
«Үрдүк технологиялаах медицинскэй көмөнү оҥорор специалистар Россия киин уонна омук дойдуларын үрдүк үөрэҕин кыһаларыгар, ону таһынан ХИФУ базатыгар үөрэниэхтэрэ», — диэтэ миниистир.
Уларытыы түмүгэр киһи олоҕун уһуна 8 сылынан эбиллиэхтээх, киһи ыарыыттан өлүүтүн ахсаана кыччатыллыахтаах, нэһилиэнньэ медицинскэй көмө хаачыстыбатын үчүгэйинэн сыаналыыра үрдүөхтээх. Ылыллбыт сорук 2030 сылга диэри ситиһиллиэхтээх.
This post was published on 22.07.2016 11:10 11:10